Тываның А. С. Пушкин аттыг Национал ном саңының национал болгаш чурт-шинчилел чогаалының килдизинге  2021 чылдың  апрель 21-де филология эртемнериниң кандидады, Россияның чогаалчылар эвилелиниң кежигүнү, Тыва Республиканың эртем талазы-биле алдарлыг ажылдакчызы, амгы үениң тыва тюркологу, тыва улустуң аас чогаалының шинчилекчизи Зоя Баировна Самданның юбилейин уткуштур база чаа үнген «Үелерниң үзүк чок дизии: гуманитарлыг эртемниң шапкынчызы» деп номунуң таныштырылгазы болуп эрткен.

         Ужуражылгага  культурология эртемнериниң доктору З. К. Кыргыс база бүгү делегей чергелиг хөөмей академиязының удуртукчузу Б-Д. Ондар өөреникчилери-биле хөгжүмнүг байырны чедирген.

Дараазында Тываның гумманитарлыг болгаш социал-экономиктиг шинчилелдер институдунуң эртем ажылдакчылары: У. А. Донгак, В. С. Салчак, Л. С. Мижит, М. Б. Кунгаа,  Б. Баярсайхан, К.-М. А. Симчит болгаш Тываның күрүне университединиң башкылары, студентилери, Кызылдың башкы колледжиниң тыва дыл башкызы И. Д. Ооржак студентилери-биле  З. Б. Самданның ужуражылгазынга  киржип байырны чедирген.