Бөгүн январь 15-те, Кунгуртугнуң база бир төлептиг салым-чаяанныг оглу, Тыва республиканың культура яамызының сайыды Виктор Сергеевич Чигжит 60 харлаан.

Тываның төлеп-ишчи оолдарының бирээзи, билдингир культура ажылдакчызы Виктор Чигжит 1965 ч. январь 15-те кайгамчык бойдус чурумалдыг, эм-дом болган изиг аржааны-биле алдаржаан Кунгуртуг сумузунга төрүттүнген. Школачы үелеринде-ле ол ыры-хөгжүмге сонуургалдыг болганы-биле, үе-чергези эштерин эвилелдеп, суур, кожуун чергелиг көрүлделерге, фестивальдарга бо-ла киржир турган. Аҗылче баштайгы базымын уруглар садынга ыры-хөгжүм башкызы болуп ажылдап эгелээн. Ясли-садиктиң кижизидикчи башкылары ооң даанган ажылынга тура-соруктуун, уруглар-биле эвилең-ээлдээн эскерип, мактап турганнар. Оон-на ол чалгынналып, эртем чедип алыры чугула дээрзин билип, Чөөн-Сибирьниң күрүнениң культура институдунче дужаап алган. Студент чылдарында уран чүүл талазы-биле ханы билиглерни чүткүлдүү-биле шиңгээдип ап, эки өөредилге болгаш хөй-ниитижи чоруу дээш, төрээн совхозунуң мурнундан «тергиин өөредилгелиг стипендиат» деп атка төлептиин көргүскен. Өөредилгезин чедиишкинниг дооскаш, билиг-мергежили бышкан аныяк каадыр, 1988 ч. өскен сууру Кунгуртугнуң уран чүүл школазынга баян башкызы болбушаан, база школаның ыры-хөгжүм удуртукчузу кылдыр ажылдай берген.

Виктор Чигжит Абаканның, Кызыл кожууннуң культура бажыңнарынга удуртукчулап, ол ышкаш Сукпактың, Республиканың салым-чаяанныг уругларның уран чүүл школаларынга, Алдан-Маадыр аттыг музейге директорлаан. Каяа-даа, кандыг-даа ажылдарга ажылдап тургаш, ол бодунуң көскү изин арттырып, хөйнү кылганын демдеглеп болур. Ол удуртуп турар ажылынга ээ харыысалгалыг болуп, бодунга база кады ажылдаан эш-өөрүнге негелдиин көргүзүп, оларның бүзүрелин чаалап ап келген.

Виктор Чигжиттиң бир онзагай талазы бөдүүн, чончу, арга-сүмезин аныяк өскенге дамчыдып, оларның идегелдиг талалакчызы болуп, үениң чаа базымы-биле уран чүүлдүң янзы-бүрү хевирлеринче эвилелдеп, хандыкшыдып, дыка хөй салым-чаяанныг каадырларны деткип, улуг идигни берип чоруур дагдыныкчы.

«Чер-черлерде культура одагларының ажыл-агыйының кайы хире чоруп турарын билип алырда, бодумнуң карактарым-биле көөрү меңээ чугула» – деп, ол үргүлчү мынчаар чугааланыр, ынчангаш кайы-даа ырак кожууннуң сумуларынче, сагындырыг чокка-ла, сургакчылап чоруптар чаңчылдыг.

Виктор Сергеевич Чигжит бүгү амыдыралының оруун уран чүүлге, культурага бараалгадып чоруур, бодунуң ажылынга бердингени болгаш бурунгаар көрүжү-биле күзел-соруун хүн бүрүде боттандырып, чонунга, национал культуразынга ынакшылды, чаагай чаңчылдарывысты камныг кадагалап арттырар хамаарылганы, хүндүткелдиг болурун суртаалдап чоруур көскү удуртукчуларның бирээзи.

Хүндүлүг Виктор Сергеевич! Төрүттүнген хүнүңер-биле А. С. Пушкин аттыг Национал ном саңының мурнундан мугур харлаан оюңар таварыштыр чылыг-чымчак байырывысты чедирип, каң дег быжыг кадыкшылды, амыдырал-чуртталгаңарга аас-кежикти, уран чүүлдүң сайзыралынга киирип чоруур чымыштыг ажыл-чорудулгаңарга ам-даа чогаадыкчы сайзыралды, чаа-чаа ажыдыышкыннарны сеткиливис ханызындан күзеп тур бис!

Хүндүткел-биле,