Россияда 2012 чылдан эгелеп, чоннуң
база номчукчуларның сонуургалын хаара тудары-биле «Библиодүн» деп акцияны
эрттирип турар апарган.
Бо хемчегниӊ кол сорулгазы – чоннуң
культурлуг дыштанылгазынга чаа солун аргаларны ажыглап сайзырадыры, библиотека чүгле
ном номчуур шыгжамыр эвес, а кижилерниң амы-хууда культурлуг дыштанырының, харылзажырының
төвү, ол ышкаш номга ынактарның сонуургалын улам-на идепкейжидип, тускай
программалыг хемчеглерге киржирин суртаалдаары.
Бистиң А. С. Пушкин аттыг Национал библиотекавыс
өске библиотекалардан дудак чок, чылдың-на бо хемчегни деткип, бир демниг,
идепкейлиг киржип турар. Чылдан-чылче «Библиодүн» деп акцияның киржикчилери
көвүдеп, улуг-биче чоннуң сонуургалы бедип, килдистер аайы-биле тус-тузунда
белеткээн солун, ажыктыг хемчеглерге (янзы-бүрү темалыг делгелгелер, тускай
төлевилелдер, ужуражылгалар, артистерниң оюн-көргүзүглери, танцы-сам, викториналар,
квест-оюннар…) дүннүң орайы дивейн, сылдыстарның чивеңнешкен чырыын магадап, бир
янзы сеткил-хөөнге алзып, күзелдии-биле киржип турарлар.
Бо чылын «Библиодүн», апрель 24-те,
кежээкиниң 6 шактан эгелеп, «Ном – сылдыстарже орук» деп кыйгының адаа-биле
эрттерин дамчыдып, солун хемчеглерге идепкейлиг киржип, келиринче чаладывыс.
