Ноябрь 28-те Улусчу чогаадылга бажыңында ат-сураглыг чогаалчылар, аас чогаалдың эдилекчилери, культураның болгаш ѳске-даа албан черлериниң ажылдакчылары, тыва чогаалдың мѳгейикчилери чыглып, Чогаалчылар эвилелиниң 80 чыл оюнга тураскааткан байырлыг хуралга киришкеннер.

       Тываның Чогаалчылар эвилелиниң тургустунган хүнү – 1942 чылдың октябрь 10. Ол үеден тура, чогаалчылар сагыш-сеткиливистиң ѳнчүзү болган тѳрээн дылывысты сайзырадып, камгалап-кадагалап, келир үениң чаш салгалдарынга чиңгине тыва дылды хумагалап, арттырып, тѳрээн чогаал делегейин ѳске чоннарның чогаалы болгаш культуразы-биле байлакшыдып, тыва аас чогаалдарны, шүлүктерни делегей чоннарының дылдарынче очулдуруп, тыва деп омак сѳѳгүвүстү ѳске чоннарга таныштырып, дыка улуг элеп-читпес, үре-түңнелдиг ажылды чорудуп турар.

       Эвилелдиң 80 чыл оюн байырлап, демдеглээри чугула.

Байырлыг хемчегге А.С. Пушкин аттыг Национал ном саңының ажылдакчылары идепкейлиг киришкеннер. Олар «Тываның Чогаалчылар эвилели – 80 чыл ою» деп номнар делгелгезин дерээннер. Ук делгелгеде Тыва Республиканың аас чогаалының үндезилекчилериниң болгаш ѳске-даа уран-талантылыг чогаалчыларның номнары салдынган.

   Ынак чогаалчыларывыстың ѳңгүр, каас чараш номнары дериттинген делгелге чалаткан аалчыларның сонуургалын оттуруп, хемчегни аян-шинчи киирген.