Апрель
28-те Тываныӊ күрүнениӊ ойнаар-кыстар театрынга салым-чаяанныг чогаалчы, цирк
артизи Алексей Агбаанович Хуурактың чырык адынга тураскааткан чогаадыкчы
кежээ болуп эрткен. Ук хемчегниӊ эртирген сорулгазы – чогаалчыныӊ чаа үнген «Адам, ɵгбем Кɵдүрге деп адап алган…» деп
аттыг номунуӊ таныштырылгазы болган.
Кежээни
эртемден В. С. Салчак удуртуп
эрттирген. Байырлалга республиканыӊ чогаалчылар Эвилелдериниӊ удуртукчулары:
шүлүкчү, Россияныӊ журналистер эвилелиниӊ кежигүнү, ТР-ниӊ чогаалчылар Эвилелиниӊ
кежигүнү С. М. Ондур; филология
эртемнериниӊ кандидады, очулдурукчу, чогаал сайгарыкчызы С. С. Комбу; чогаалчы, башкы, РФ-тиӊ чогаалчылар Эвилелиниӊ
кежигүнү М. Н. Ооржак; уран чүүлдүӊ
кандидады, А. Б. Чыргал-оол аттыг уран чүүл колледжизиниӊ директору А. Х. Каӊ-оол болгаш өскелер-даа А.
Хуурактыӊ чогаалыкчы ажыл-ижинге хамаарышкан илеткелдерни кылган.
А.
С. Пушкин аттыг Национал ном саӊыныӊ ажылдакчылары чогаалчы А. Хуурактыӊ
ажыл-ижинге тураскааткан номнар делгелгезин кылган. Аӊаа чогаалчыныныӊ өг-бүлезинден
алган солун, төөгүлүг чуруктарны база салган.
Кежээни
каастап Национал театрныӊ артистери, Кызылдыӊ уран чүүл колледжизиниӊ
сургуулдары, башкылары чогаалчыныӊ шүлүктеринден бижиттинген ырларны,
шүлүктерни күүсеткеннер.
«Адам, ɵгбем Кɵдүрге деп адап алган…» деп чогаалдар
чыындызын национал болгаш чурт-шинчилел чогаалының килдизиниң ажылдакчылары Е. М. Ак-кыс, Ч. Э. Монгуш белеткээннер.
Номнуӊ
эге сɵзүн башкы, филология эртемнериниң кандидады К. Б. Доржу бижээн, филология эртемнериниң доктору Б. Ч. Ооржак редакторлаан. Номнуң адын чогаалчының уруу, психология
эртемнериниң кандидады Татьяна Алексеевна
Ондар адаан. Номнуӊ адыныӊ
дугайында чогаалчыныӊ бижээни «Кɵдүрге» деп шүлүүнден билип ап болур:
Арысканның
чурттакчызы эвес кижи
Адын
билбес, унун тыппас бичии хем бар.
Азырадып,
чурттап ɵскен ынак хемин
Адам,
ɵгбем Кɵдүрге деп адап алган…
Кежээге
А. Хуурактыӊ өг-бүлезиниӊ, ажыл-ижиниӊ дугайында чуруктарны Кызылдыӊ уран чүүл
колледжизиниӊ чурулга салбырыныӊ сургуулдары чурааш делгелгени кылганнар. Тергиин
чураан сургуулдарга чогаалчыныӊ уруу Т. А. Ондар шаӊналдарны тывыскан.
Байырлыг
кежээ чогаалчыныӊ төрелдериниӊ сактыышкын чугаалары-биле доозулган.
