Литературлуг
альманах «Улуг-Хем» бо хүн бодунуң
үнгенинден бээр 75 чыл оюн демдеглеп турар. Ол Тыва Арат Республиканың Совет
Эвилелиниң хүрээлелинче киргенинден бээр
ийи чыл болганда көстүп келген (1946 ч).
Бо хүнге чедир «Улуг-Хем»
литературлуг альманагы тыва чогаалдың мөгейикчилеринге шынчы болуп артпышаан,
харын-даа мырыңай үениң тевиинге алзып, «Улуг-Хемниң агымы» деп чаа аттыг
номчукчуларның сонуургалын хаара тудуп, номчуштуг арыннарны аҗыдып турар. Ында
чогаалчы салым-чаяаны шылгараан, шүлүкчү ат-сураа алгый берген авторларның
шүлүктери, улуг, биче хемчээлдиг чечен чугаалар, тооҗулар база чогаал
критиктериниң сайгарылгаларын чырыдып турар. Ол ышкаш эгелеп чоруур аныяк биҗикчилерге
орукту аҗыдып, оларның улам ыңай өзүп, быҗыгарынга деткимчени берип турары
чугааҗок.
Альманахтың
редколлегия кеҗигүннеринге тыва литератураның начыннары Сергей Пюрбю, Степан Сарыг-оол, Олег Саган-оол, Юрий Күнзегеш, Кызыл-Эник Кудажы, Салим Сүрүң-оол, Александр Даржай, Черлиг-оол Куулар утка-шынарының-даа,
уран-чечениниң-даа талазын көрүп, чогаадыкчы көдүрлүүшкүннүг аҗылдап турганнар.
Кандыг-даа
солуннуң, сеткүүлдүң, чырыкче чаа үнген номнуң үнелиин, амыдыралга аҗыктыын чон
эскерер болгай, ынчангаш «Улуг-Хем» литературлуг сеткүүл тыва литератураның
сайзыралынга үлүг-хуузун киирип, ооң эрткен салым-чолу чон-биле тудуш болуп,
ылаңгыя аныяк чогаалчыларга салдарлыг
болуп турганын демдеглээри чугула.
Литературлуг
сеткүүлүвүстүң юбилейин таварыштыр Тыва
Республиканыӊ А. С. Пушкин аттыг ном саӊы номчукчуларының мурнундан байырны чедирип, ооң арыннарынга амгы үениң көрүҗү-биле чоннуң сеткил-сагыҗын сергедип,
хей-аъдын бедидер чогаалдар үзүлбес болзун деп йөрээп тур!
