Июль 27-28-те Россияның Кеземче күүселдезин чорудар федералдыг
албанының ТР-де эргелелиниң № 2, №3 дугаар эдип-чазаар колониязында «Авам, ачам
номчуп турлар» («Читает мама, читает папа») деп төлевилелдиң шииттирген
киржикчилерниң аянныг номчуурунга өөредир кичээл уламчылаан.
Бо төлевилел А. С. Пушкин аттыг ном
саңының болгаш Россияның эдип чазаар албан чериниң Тывада эргелелиниң демниг харылзаазының түңнелинде
боттанып келгеш, Президентиниң грантылар
фондузунуң 9308 чагыгларның аразындан тиилекчи төлевилелдерниң бирээзи болган.
Амгы үеде Россия Федерациязында чаңгыс мындыг тускай төлевил болуп турар.
Ооң кол сорулгазы хоругдалда кижилерни
чуртталгага белеткээри, ада-ие кижилерниң эрге-ажыктарын болгаш хүлээлгелерин
тайылбырлаары база оларның назы-хар четпээн ажы-төлү-биле
харылзаазын күштелдирип, бичии ажы-төлдүң
номга сонуургалын оттуруп, улгаттырып алыры.
Бо ажылды күүседирде,
шииттирген ада-ие боттарының
болгаш ажы-төлүнүң сонуургалының аайы-биле шилип алган литературазын номчуур, ону видео болгаш
аудио бижик-биле тыттыргаш, уругларынга дамчыдар. Чоорту ада-иелер биле оларның ажы-төлүнүң аразында
онлайн-номчулгаларны чорудуп болурунуң аргаларын база өөренип көрүп турар.
Ындыг арга-биле ада-иелер болгаш уругларының аразында чоок харылзаалары үзүлбейн улам
быжыгар.
Төлевилелде 25 кижи киржип
турар: 4 эр болгаш 21 херээжен. Бичии тоолчугаштарны бодаарга номчууру белен
ышкаш, оларны арыг, аянныг, утказын хандыр сайгарып чедирип бээри база нарын
болуп турар. Ынчангаш аудио- видео бижик кылырының мурнунда киржикчилерни
аянныг номчуурунуң аргаларын шиңгээдип, белеткеп алыры. Төлевилелдиң аянныг
номчулга башкызы-биле тыва дылче очулдуртунган моол улустуң тоолдары «Ыт, Диис
болгаш Күске», «Мегелеткен теве» база орус дыл кырында тыва улустуң «Куштар чүге
чугааланмайн турарыл» деп тоолун номчааннар.
Аянныг номчуп өөредир кичээл эки болуп эрткен. Киржикчилер төлевилелди аажок сонуургап, идекпейлиг өөренип турар.
«Авам, ачам номчуп турлар» деп төлевилел ам-даа уламчылаар.
А.
А. Ондар, төлевилелдиң методизи.
