А. С. Пушкин аттыг национал ном
саӊыныӊ директорунуң оралакчызы Ооржак Рада Ооржаковна мугур харлаанын демдеглеп эрттирип
турар.
Бо чараш байырлалыңар таварыштыр чылыг-чымчак байырывысты
чедирип, хая-даш дег быжыг кадыкшылды, аржаан суу дег арыг-кылаң
өөрүшкү-маңнайны, ажыл-ижиңерге моон-даа соңгаар хей-аъдыңар бедик,
чүткүл-сорууңар күштүг болуп, чогаадыкчы, демниг чедиишкиннер улам хөгжүп,
сайзыраарын сеткиливис ханызындан күзедивис!
Ол 1976 ч. февраль 19-та Сүт-Хөл кожууннуң бойдус байлаа эгээртинмес, онзагай чурумалдыг сууру Суг-Аксынга
төрүттүнген. Хостуг
амыдырал дээш демисежип чораан, эрес- дидим маадырларның чурту Алдан-Маадыр школазынга белеткел клазынга өөренип киргеш, 1993
ч. Кызылдың 9 дугаар школа-гимназиязын дооскан. Улаштыр Саратов хоорайның Ю. А.
Гагарин аттыг үлетпүрлүг башкы колледжизинче кирип алган. 1996 ч. ук өөредилге
черин чедиишкинниг дооскаш, Ээрбек школазынга күш-ажыл башкызы
кылдыр ажылдай берген.
Рада Ооржаковна ТР-ниң А. С. Пушкин
аттыг национал ном саңынга 2000 ч. эгелеп ажылдай берген. Аныяк кадрның
ажылынга кызымаан, чүткүлдүүн, бир-ле чаа чүүлдү шалыпкын кылыптарын эскерип
көргеш, килдис удуртур кылдыр депшиткен. Ол
ажылының аайы-биле эртем-билиин бедидип, Чөөн-Сибирьниң культура болгаш уран чүүлүнүң күрүне академиязынга өөренип, 2006 ч. дээди
эртемни чедип алган.
Рада Ооржак аныяандан
тура, 26 чыл иштинде, даанган ажылынга шынчы сеткили-биле бердинип, А. С.
Пушкин аттыг национал ном саңынга үре-түңнелдиг,
кады ажылдаан эш-өөрүнүң хүндүткелин чаалап ап, ажылдап келген. Ол хөй-ниити ажылының идепкейлиг киржикчизи, эрттип
турар хемчеглерниң, грантыларның хөй санныг төлевилелдерниң удуртукчуларының
бирээзи. Ооң чымыш долган чогаадыкчы ажыл-ижинге моон-даа соңгаар
чаартыкчы чедиишкиннерни күзеп каалыңар.
Рада Ооржаковна культура, уран чүүл шугумунга хөй чылдарда киирген шудургу, билдилиг, шалып ишчи ажыл-ижи дээш, хөй-хөй шаңнал - макталдарны алган. Тыва Республиканың культуразының, Дээди хуралдың, Тыва Республиканың чазааның Хүндүлел бижиктери-биле база «Культураның тергиини» деп медальдың эдилекчизи
