Галина Петровна Бессмертная – Тыва
Республиканың культуразының алдарлыг ажылдакчызы, ном саңының хоочуну, хоорай
хевирлиг суур Каа-Хемниң Хүндүлүг хамаатызы.
Ол 1939 ч. август 3-те Абакан
хоорайга ажылчын өг-бүлеге төрүттүнген. 1946 ч. эгелээш, ажыл-амыдыралының
аайы-биле Тывага турумчуп чурттай берген. Ол үеде комсомолдуң дээди
башкарылгазының дилээ-биле, 1965 ч. эгелээш, Усть-Элегес суурнуң ном саңын
удуртуп ажылдаан. 1967 ч. Канскиниң ном саңын бот-өөредилге-биле өөренгеш,
кызыл дипломнуг дооскан. Галина Петровнаның арга-дуржулгазының бедиин, ажылынга
негелделиин барымдаалааш, 1971-1974 чылдарда хоорайның № 5 дугаар ном саңының
номчулга залының удуртукчузунга, удаваанда ооң директорунга чедир депшип
ажылдаан. Ажылдап келген үелеринде шаптараазыннар турза-даа, ол кызымаккай
чүткүлдүү-биле хүлээнген ажылынга ээ-харыысалгалыын көргүзүп, номчукчулар
аразынга база аныяк өскени номга ынак, номчулгага сундулуг болурун чедип
алыры-биле хөй-ле чагыг-суртаал ажылдарын кылып келген. Ооң шыңгыы негелделии,
тура-соруккуру, номчукчуларга эвилең-ээлдек, сагыш-човангыр чоруу ажыл-херээнге
улуг идиг, ужур-дуза болуп келген.
Галина Петровна ажылдап келген
үелеринде республиканың ном саңнарының бурунгаар сайзыралынче, методиктиг
хандырылгазының чаартылгазынче сагышты салып, чугула айтырыгларны чөптүү-биле
шиитпирлежип, хөй-ле федералдыг программаларны сайгаржып, оларның боттанырынга
арга-сүмезин кадып, улуг үлүүн киириштирип келген. Өске черлерниң ном
саңнарының ажылын, арга-дуржулгазын сонуургап, аныяк ажылдакчыларга бодунуң
эгээртинмес байлак дуржулгазын харам чокка дамчыдып берип чораан, эвилең-ээлдек,
дузааргак дагдыныкчы.
Ол чүгле ном саңының ажылы-биле
кызыгаарлаттынмайн, кожууннуң хөй-ниити ажылының идепкейлиг киржикчизи,
херээженнер чөвүлелин сес чыл ажыр удуртуп келген. Хостуг үелеринде шүлүктер
чогаадыр, олары «Тувинская правда», «Кызыл
кожууннуң медээзи» деп солуннарга
парлаттынып турган. «Серебрянка» деп ыры-хөгжүм ансамблиниң солизи, бодунуң
чогааткан шүлүктерин аңаа күзелдии-биле чугаалаар. Ооң үре-түңнелдиг
ажыл-чорудулгазын үнелеп, Тыва Республиканың Культура яамызының Хүндүлүг
бижиктери-биле чаңгыс эвес удаа демдеглээн. Ол ышкаш «Москвага
аныяктарның болгаш сургуулдарның он ийиги Бүгү делегей чергелиг фестивалынга
идепкейлиг киржилгези дээш» деп комсомолдуң
Төп комитединиң хөрек демдээ (1985) база «Шылгараңгай
күш-ажыл» (1970) деп медаль-биле шаңнаткан.
Республикавыстың ном саңнарының
сайзыралынга улуг үлүг-хуузун киириштирип чораан хүндүлүг хоочунувус Галина
Петровнага төрүттүнген хүнү-биле изиг байырывыс чедирбишаан, быжыг кадыкшылды,
узун назынны күзедивис!
Материалды И. Д. Ооржак белеткээн
