Вячеслав Альбертович
Танов – салым-чаяанныг композитор, башкы, Россия
Федерациязының болгаш Тыва Республиканың культуразының алдарлыг ажылдакчызы.
Ол сураглыг
композитор, ыры башкызы Альберт Седип-оолович Тановтуң база тыва литератураның
сайзыралынга чогаадыкчы улуг үлүг-хуузун киирген, онзагай үннүг херээжен чогаалчы
Екатерина Танованың өг-бүлезинге, 1959 ч. июль 1-де, Кызыл хоорайга
төрүттүнген.
Кызылдың № 3
дугаар школазын, ол ышкаш уран чүүл школазының скрипка клазын база дооскан. 1978 ч. Кызылдың уран чүүл
училищезиниң үрер-хөгжүм салбырынче кирип алган. 1983 ч. училищениң флейта
клазын чедиишкинниг дооскаш, ол-ла чылын Республиканың Р. Кенденбиль аттыг
уругларның ниити билигниң болгаш уран чүүлдүң школа-интернадынга ыры- хөгжүм кичээлин
башкылаары-биле кирип алган. Ооң өөреткен сургуулдары кожууннарның аңгы-аңгы
булуңнарында культура килдистеринде, школаларда үре-түңнелдиг ажылдап
чоруурлар. Ажылдап турган үелеринде ыры башкыларынга, уран чүүл школаларынга
кичээлдерге ажыглаары-биле методиктиг сүме-дискилерни чогаадып, нептередип
үндүргүлээн. Ол республика чергелиг композиторлар аразынга «авторлуг ырылар» мөөрейлеринге
бо-ла киржир турган, түңнелинде кандыг-ла бир дээди шаңналга төлептиг болур. 1995
ч. Тыва дугайында эң дээре ыры мөөрейинге гран-при шаңналын алган. Вячеслав
Танов хөй киржикчилиг танцы-самның ыры-хөгжүмүнге тааржыр аялгалар чогаадып бижиир
бойдустан салым-чаяанныг хөгжүмчү.
Школачылар аразында өзүп олурар салгалдың уран чүүлге сонуургалын оттуруп,
ырлаар салым-чаяанын ажыдары-биле чылдың-на республика чергелиг эрттип турар «Хамнаарак» мөөрейинге уругларның сеткил-сагыжынга тааржыры-биле шилип ап турар хөй-ле
ырыларның автору. Оларның аразындан эң-не билдингир уругларның ырлажыр ынак
ырылары: «Бора-Шээлей», «Ачамга», «Артыш», «Сылдыстарның
кадарчызы» база чонда дүргени-биле тараан ырылар: «Чалыы Тывам, чечектел-ле!», «Чаңгыс
дуруяа», «Чедип алдынмас сылдыс»,
«Кудалар» дээш, оон-даа өске.
Ыры-хөгжүмге чаяаттынган,
ооң-биле чүгленген, адазының соон изээн композиторувуска төрүттүнген хүнү-биле
байырывыс чедирбишаан, өзүп олурар салгалдарывыска тааржыр чараш аялгаларны
ам-даа чогаадырын күзеп, сүлде-сүзүү, хей-аъды улам-на чалгынналырын йөрээп,
кадыкшылды күзедивис!
Материалды И. Д. Ооржак белеткээн.
