А. С. Пушкин
аттыг Национал ном саңынга бөгүн Тываның Улустуң чогаалчызы Салим Сазыгович
Сүрүң-оолдуң 100 харлаанынга тураскааткан сактыышкын-ужуражылганы чурт-шинчилел
болгаш чогаал килдизиниң ажылдакчылары эрттиргеннер.
Тыва чечен
чогаалдың үндезилекчилериниң изеп кааны кокпазын улам алгыдып, делгем орукче
шуут-ла үнүпкен, бодунуң үезиниң чаа үннүг ыраажызы – тыва чогаалчыларның ийи
дугаар салгалы Салим Сазыгович Сүрүң-оол 1924 ч. апрель 15-тиң хүнүнде
Барыын-Хемчик кожууннуң Акка төрүттүнген.
Чогаал ажылын 1946 ч. эгелээн.
Шүлүк болгаш проза жанрларынга бижип чораан. Ол шупту 22 шүлүк болгаш проза
номнарының автору.
Ужуражылганы Тываның билдингир
ат-сураглыг композитору Владимир Бюрбюевич база ыраажылар Олег Николаевич,
Дамырак чогаалчының «Өглеривис», «Сылдыс», «Ынакшыл-дыр» деп ырылары-биле
ажытканнар.
Ук ужуражылгага Тываның
гуманитарлыг шинчилелдер институдунуң директорунуң эртем талазы-биле
оралакчызы, филология эртемнериниң кандидады Уран Алдын-ооловна Донгак чогаалчының
болгаш чогаалдарының дугайында улуг үнелел сөстерни чугаалаан: «Эң баштайгы болгаш
сөөлгү тоожузунга чедир бодунуң шилип алган кол угланыышкыны кижиниң бот-хуунуң
туружу, бодунуң дугайында, кижи канчаар чурттап чоруурул? деп бо айтырыгны
бодунга салгаштың, шупту чогаалдарын колдуунда ынчаар бижээн...».
Ол ышкаш Тываның Улустуң
чогаалчызы, башкы Мария Амын-ооловна Күжүгет Салим Сазыговичиниң дугайында
сактып чугаалаан. Башкының сургуулдары «Көк-көк
даглар» болгаш «Май» деп
шүлүктерин чугаалап бергеннер. К. И.
Чуковский аттыг уругларның ном саңының чурт-шинчилел болгаш чогаал килдизиниң
эргелекчизи Саяна Маадыр-ооловна «Тыва
номчуп тур» деп төлевилелди чугаалавышаан, чогаалчының автографтыг номнары-биле аалчыларны таныштырган.
Салим
Сүрүң-оолдуң чоок төрелдери ужуражылгага кээп, чогаалчының дугайында аалчыларга
солун сактыышкыннарын чугаалааш, четтиргенин илереткеннер.
Тыва Республиканың А. С. Пушкин
аттыг Национал ном саңының удуртукчузу Ирина Алексеевна Эртине чыглып келген
аалчыларга: сургуулдарга, өөреникчилерге база чогаалчыларга, эртемденнерге,
ыраажыларга болгаш чогаалчының чоок төрелдеринге чедип келгенинге четтиргенин
илередип, чылыг чымчак сөстерин чугаалаан.
Келген
улуг-биче аалчылар ужуражылганы улуг өөрүшкү-биле сонуургааннар. Солун сактыышкын-ужуражылга
шайлаашкын болгаш төөгүлүг чурукка тырттырганы-биле доозулган.
