Апрель
26-ның хүнүнде, национал болгаш чурт-шинчилел чогаалының килдис ажылдакчылары,
Кызылдың 15 дугаар гимназиязының 10 «в» клазының өөреникчилеринге «Тывызыксыг
Тывам» деп аттыг айтырыг-харыыларлыг «Сээң оюннуң» деп хемчегни
эрттиргеннер.
Уруглар ийи
аңгы бөлүк болуп алгаш, «Шоколадтар», «Мармеладтар» деп аттарны боттары чогаадып адааш, аразында мөөрейлежип
ойнааннар.
Ук хемчегге
электроннуг презентацияның дузазы-биле тыва улустуң аас чогаалынга,
чогаалчыларның чогаалдарынга, тыва дыл база амгы шагның тыва ырылар болгаш тыва
чемнер дугайында айтырыгларга харыылааннар. Олар айтырыг бүрүзүнге тодаргай
харыыларны берип, идепкейлиг киришкеннер.
Уруглар айтырыг-харыыларлыг
оюннарга улуг сонуургалдыг киржип, ажыктыг, өөредиглиг чүүлдерни билип
алганынга четтиргенин илереткеннер.
