Бөгүн национал болгаш
чурт-шинчилел чогаалының килдизиниң ажылдакчылары Тываның парлалгазының
төөгүзүнге бир-ле дугаар херээжен чонга арга-сүмелиг «Кадын» деп сеткүүлдүң чырыкче үнгенинден бээр 30 чыл болган оюн демдеглеп эрттирген.
«Кадын» сеткүүлү 1990 чылдарда дыка хөй солун, ажыктыг ажылдарны
(материалдарны) номчукчуларга бараалгадып турган. Ол дээрге тыва улустуң
ужур-чаңчылдарын, ынакшыл, өг-бүле, ажы-төл кижизидилгези база ажылынга шылгараан
аваларның дугайында дээш, оон-даа өске ажылдарны чырыдып турган.
Бо сеткүүлдүң тургузукчузу
болгаш кол редактору Тыва Республиканың Улустуң чогаалчызы, ССРЭ-ниң болгаш
Тыва Республиканың журналистер Эвилелдериниң кежигүнү Артык Хөм-Оттуковна Ховалыг. Ол амгы үеде Москва хоорайда чурттап
чоруур.
А. Ховалыгның соонда сеткүүлдүң
кол редактору кылдыр, ооң уруу Дарина Витальевна Ховалыг ажылдап турган. Ол
дыка чуруттунар болгаш «Кадын» сеткүүлүнүң чурукчузу турган.
Ук хемчегге ТР-ниң Дээди
Хуралының депутады Аяна Монгуш, Тываның чогаалчылар Эвилелиниң даргазы Сайлыкмаа
Комбу, Тываның гуманитарлыг болгаш социал-экономиктиг тускай шинчилелдер
институдунуң эртем ажылдакчызы Василий Салчак, хоочун журналист Светлана
Балчыр, журналист Шончалай Ховалыг, Тываның Улустуң чогаалчызы Кара-Күске
Чооду, чогаалчы, РФ-ниң журналистер Эвилелиниң кежигүнү Александр Шоюн, ТР-ниң
П. А. Морозов аттыг күрүнениң агролицейиниң башкызы Чаяна Шилова дээш, оон-даа
өске аалчылар идепкейлиг киришкеннер.
