Бөгүн ТР-ниң А. С. Пушкин аттыг Национал ном саңынга Тываның алдарлыг улусчу эртемдени, аас-чогаалының сураглыг чыыкчызы Дарыма Киш-Чалааевич Ондарның 90 харлаанынга тураскааткан солун кежээ болуп эрткен.
Хемчегни «Тыва кызы» деп бөлүк чараш ыры-самы-биле ажыткан. Кежээге өөнүң ишти Дайгымаа Астыкпановна, уруглары Чечек Ондаровна, Урана Ондаровна, Россияның болгаш Тываның чогаалчылар Эвилелиниң кежигүнү Александр Сүүр-оолович Ондар база эртемденниң чоок төрелдери келгеннер.
Хемчегни Чечек Ондаровна удуртуп эрттирип, келген аалчыларга Киш-Чалааевичиниң ук-намдарын, ооң дугайында солун сактыышкыннарны, төөгүлерни чугаалаан.
Ном саңының национал чурт-шинчилел болгаш чогаал килдизиниң ажылдакчылары «Дарыма башкы» деп солун номнар делгелгезин салган. Делгелгеге эртемденниң чыып тургусканы тывызыктар, тоолдар база ооң дугайында бижээн үнелелдерлиг номнар, чуруктар салдынган.
Дарыма Киш-Чалааевичиниң өг-бүлези келген аалчыларга өөрүп четтиргенин илередип, ооң тывызыктарын болгаш кады ажылдап чораан эш-өөрүнүң үнелелдерин киирген чараш открыткаларны белекке бергеннер.
