Уругларның шүлүк чогаалынга база бир чаа автор
немешкенинге өөрүп, А.С.Пушкин аттыг Национал ном саңының мурнундан
байырывыс чедирип, аныяк шүлүкчүнүң бийири ам-даа ылгын болуп,
бичии чаштарга шүлүктери удаа-дараа чогааттынып
турарын йөрээдивис.
Ондар
Светлана Алексеевна – аныяк шүлүкчү, Тываның чогаалчылар эвилелиниң кежигүнү.
Ооң алыс чер-чурту Бай-Тайганың
Кара-Хөл. Школага тургаш-ла, «Чаагай чаңчыл» деп бөлгүмнүң идепкейлиг киржикчизи турган. 8 дугаар
классска «Сылдысчыгаш» солунунга «Чечектерим» деп шүлүү
парлаттынган. Солунга үнген бирги шүлүүнге
башкызы Салчак Вера Чанзановна-даа (амгы үеде бистиң аравыста чок), боду-даа
аажок өөрүп, улаштыр шүлүк чогаадыр күзели кыптыгып, бижиттинип эгелээн. Оон
эгелээш-ле, «Сылдысчыгаш» солунунга шүлүктери бо-ла үнгүлээр апарган.
Бичии уругларның назы-харынга чүүлдештир шүлүк бижиири
нарын-даа, берге-даа. Оларның сагыш-сеткилинге, дыл-домаанга, билиг-деңнелинге
таарыштыр чогаадыры чугула болгай. Ынчангаш
уругларның билиишкининиң деңнелин барымдаалап, уругларга белек кылдыр Светлана
Ондарның шүлүктериниң номнары: «Тывыңарам
кым-дыр бо?» (2021), «Өңгүр өңнер» ( 2022), «Мои большие друзья» (2023), «Черниң чаяан өзүмнери» (2023).
«Черниң чаяан өзүмнери» (2023) деп номун хакас дылче Илья Топоев (чогаалчы, чурукчу, драматург)
очулдурган.
Уругларга чаа арынны ажыткан, авторнуң номнары өңгүр
чараш чуруктары, онзагай овур-хевирлери, уран-чечен дылы-биле бичии
номчукчуларның сонуургалын оттурары чугаажок.
