Бөгүн  национал болгаш чурт-шинчилел чогаалының килдизиниң ажылдакчылары Кызылдың  2 дугаар школазының 9 «а» клазының өөреникчилеринге «Тывызыксыг Тывам» деп темага хамаарыштыр айтырыг-харыыларлыг «Бодунуң оюну» деп хемчегни эрттиргеннер. Класстың удуртукчу башкызы Кунгаа Долаана Николаевна.  

Уруглар ийи аңгы бөлүк болуп алгаш, бɵлүүнге «Найырал», «Эне-Сай» деп аттарны чогаадып адааш, аразында мөөрейлежип ойнааннар. Ук хемчегге электроннуг презентацияның дузазы-биле тыва улустуң аас чогаалынга, оюннарынга, чогаалчыларның чогаалдарынга, тыва ырылар дугайында айтырыгларга харыылааннар. Олар айтырыг бүрүзүнге тодаргай харыыларны берип, идепкейлиг киришкеннер.

База ол ышкаш Тыва чоннуң «Чинчи чажырары», «Аът чарыштырары» деп солун оюннарын ойнаан.

Уруглар башкызы-биле оюннарга улуг сонуургал-биле киржип, ажыктыг, өөредиглиг чүүлдерни билип алганынга четтиргенин илереткеннер.