Раиса Седиповна Стал-оол – Россияның, Тыва Республиканың культуразының алдарлыг ажылдакчызы, Тываның улустуң артизи база «Шылгараңгай күш-ажыл дээш» деп медальдың, РФ-ның «Хүндүткелдиң болгаш алдарның демдээ» ордениниң эдилекчизи. Ооң ады «Россияның тергиин кижилери», «Тыва-Урянхай энциклопедиязы» деп номнарда кирген.

Ол 1964 ч. февраль 18-те Кызыл хоорайга төрүттүнген. 2011 ч. Улан-Удэниң хореографтыг училищезин база Санк-Петербургтуң Н. К. Крупская аттыг культураның күрүне инстидудун тергиин чедиишкиннерлиг дооскан. 1982-84 чылдарда «Саян» аттыг күрүнениң ыры-танцы ансамблиниң балет артизинге, 1985 ч. эгелээш, Кызылдың уран чүүл училищезинге башкылаан. Башкылап турган үелеринде башкыларга, сургуулдарга ажыктыг «Классиктиг танцы», «Хореографтыг уран чүүлдүң төөгүзү» деп методиктиг сүмелерни, удуртулгаларны бижээн. Ол ышкаш уругларга классиктиг танцыга терминннер словарын чыып тургускан. 1993 ч. тура Кызылдың уругларның хореографтыг школазының директорунга томуйлаткан. Ооң удуртканы хореографтыг школа Россияның «100 дээре школалары» деп мөөрейниң аразынче кирип, «Уран чүүлдүң дээре школазы» деп атка төлептиг болганнар.

Раиса Седиповна Кызылдың уругларның хореография школазында «Алантос» аттыг ады-сураа Тываның иштинде хамаанчок, даштыкы чурттарда, Россияда алдаржаан бичии уругларның үлегерлиг, классиктиг ансамблиниң катаптаттынмас, салым-чаяанныг удуртукчузу. Бо хөй чылдарның дургузунда «Алантос» ансамбли янзы-бүрү мөөрейлерге киржип, уттундурбас, бедик деңнелдиг тиилелгелерни чеже удаа чедип албаан дээрил! Оларның баштайгы улуг чедиишкини «Москва чоогунуң кежээлери» деп мөөрейге 2-ги черни алганы. 2004 ч. Одесса хоорайга болган «Солун челээш» деп мөөрейге дээди шаңнал Гран-прини алганнар. Уруглар аңгы-аңгы фестивальдарга, мөөрейлерге киришкеш, ыяп-ла бедик шаңналды алырлар, Гран-при шаңналының 7 дакпыр эдилекчилери база Стамбул хоорайга болган делегей чергелиг фестивальдың алдын медалынга төлептиг тиилекчилери болганнар.
Бичии уругларның балет бөлүүн тургузуп алгаш, бирги ойнаан баледи «Чиполлино». 2011 ч. тыва чоннуң онзагай аян-хөөнүнге таарыштыр чогаадып тургускан «Шыяан ам» деп балет көрүкчүлерниң кайгамчык улуг үнелелин чаалап алган. Ол чедиишкиннерге улам-на чалгынналып, бодунуң шагда-ла күзеп чорааны, 2014 ч. англи чогаалчы Редьярд Киплингиниң «Маугли» деп чогаалынга даянгаш, аңаа үндезилеп бичии уругларга таарыштыр балетти тургусканы база улуг чедиишкин. Ооң күштүг күзели чайгаар боттанып, база катап көрүкчүлерниң бедик үнелелин алган.

Оларның удаа-дараа чедиишкиннери, харыысалгалыг, бедик көдүрлүүшкүннүг, омак-сергек мөөрейлерге киржилгези удуртукчузунуң бедик мергежилдиинде, ажылынга бердинген, быжыг тура-соруктуг Раиса Стал-оолдуң киирген ачы-буяны дээрзи чугаажок.
Салым-чаяанныг, шылгараңгай удуртукчунуң ачызында келир үеде Тывавысты алдаржыдар балериналарның саны ам-даа көвүдеп, тыва культураны сайзырадырынга боттарының үлүг-хуузун киириштирер дээрзин бүзүрээлиңер.

«Уруг бүрүзү салым-чаяанныг. Оларның салым-чаяанын ажыдарда, сагыш-сеткилинче үезинде ханылап кирери, чоок болуп, үнелеп, хүндүлеп билири чугула. Өг-бүле болгаш школа чаңгыс багда дег турар болза, ынчан уругларның салым-чаяанын үезинде ажыдары, бадыткап шыдаптары белен». (Р. Стал-оол).

Материалды И. Д. Ооржак белеткээн.