Владимир Салчакович Тока
СССР-ниң, Тываның композиторлар эвилелдериниң кежигүнү, Тываның улустуң артизи,
бирги джазмен аттың эдилекчизи чораан. Ол 1942 ч. июнь 16-да Тываның база бир
билдингир, ат-сураглыг ажылдакчыларының (ачазы Салчак Калбак-Хөрекович Тока –
Тываның Обком партиязының 1-ги секретары, тыва литератураның үндезилекчилериниң
бирээзи, авазы Хертек Амырбитовна Анчимаа – Тываның Биче Хуралының даргазы)
өг-бүлезинге төрүттүнген.
Ооң ыры-хөгжүмче бирги
базымы 1950 ч. уругларның музыка школазынче киргенинден эгелээн. Башкылары
бичии Володяны фортепиано клазынга хүлээп алган. Оон эгелээш-ле, ооң амыдыралы
ыры-хөгжүм-биле чарылбас эжишкилер дег болган.
1962 ч. Новосибирскиниң
М. И. Глинка аттыг күрүне консерваториязының фортепиано салбырының студентизи
болган. Аңаа ол, ыры-хөгжүмге сундулуун көргүзүп, профессор М. С. Лебензоннуң
тергиин дээн фортепиано школазын чедиишкинниг өөренип дооскан. Ёзулуг бойдустан
чаяалгалыг, ооң хөгжүмнү шын дыңнап билирин башкылары мактап, магадап
ханмааннар.
Владимир Токаның бирги
концерти «Тываның чурумалдары» деп симфониктиг чогаалы-биле
Москвага «Улан цэцэг» – «Кызыл чечек» деп оркестрниң үделгези-биле эрткен.
Бирги ажыдыышкын Владимирни улам-на чалгынналдырып, хей-аъдын көдүрүпкен.
Владимир Салчакович Тока ыры-хөгжүмге кайгамчык салым-чаяаны-биле «Тыва
Чайковский» деп атты чайгаар-ла чаалап алган.
Тываның симфониктиг
оркестриниң тургустунарынга болгаш бурунгаар сайзыралынга ооң киирген үлүү
улуг. Ол амыдыралының сөөлгү хүннеринге чедир Тываның күрүне филармониязының
пианизи бооп ажылдаан.
