Серен Владимир Бюрбюевич – билдингир хөгжүмчү, Тываның Композиторлар эвилелиниң кежигүнү, Тыва Республиканың культуразының алдарлыг ажылдакчызы, «Күш-ажылга шылгарал дээш» деп медальдың эдилекчизи.
Ол 1960 ч. январь 11-де Өвүр кожууннуң Торгалыг суурунга, хөй ажы-төлдүг, ыры- хөгжүмге сундулуг өг-бүлениң дун оглу болуп төрүттүнген. Владимир бичиизинден-не ырлаар, шүлүктээр, школаның, суурнуң уран чүүл көрүлделериниң идепкейлиг киржикчизи турган. 1976 ч. Торгалыг ортумак школазын дооскаш, Кызылдың уран чүүл училищезинче кирип алган. Өөренип турган үелеринде, ол баян клазынга, чергелештир үрер хөгжүм саксофонга ойнап өөренип алган. Башкыларының макталын бо-ла чаалап алыр, баянга ойнаарынга шыырак сургуулдарның санынга кирип турган.1984 ч. училищени чедиишкинниг дооскаш-ла, өскен төрээн сууру Торгалыгның уран чүүл школазын удуртуп , ажылдай берген. Владимир Серенни удаваанда Кызыл кожууннуң Солаан Базыр-оол аттыг культура одаанче удуртукчу-баянист кылдыр ажылдаары-биле чалаан. 1989 ч. хөгжүм талазы-биле билиин улам ханыладыры-биле Казаньның күрүне консерваториязынга бир чыл хуусаалыг стажировканы эрткен. 1986 ч. эгелээш, Кызыл кожууннуң уран чүүл килдизин удуртуп, хөй чылдар дургузунда улусчу чогаадыкчы төптүң директорунга ажылдаан. Ат-сураа бүгү Тывада билдингир «Аян тудаал» деп ыры-хөгжүмнүг ансамбльдиң билдилиг удуртукчузу. Ооң удуртуп-баштаар ажылындан аңгыда, көскү салым-чаяаны ырылар чогаадып бижиири. Владимир Серен «Хөгжүмнүг хээлер» (1998, 2005) «Ыры-2001, 2002», «Балгазынның кежээлери» (1998), «Ырла-ла, чүрээм», «Аялгалыг ак-көк Тывам» (2014) деп ырылар чыындыларының автору. Салым-чаяанныг композитор 200 ажыг ырыларны бижээн, олар чоннуң ынак ырылары апаргылаан. Ол ышкаш сураглыг чогаалчылар С. Сарыг-оол, С. Пюрбю, К-Э. Кудажы, Ю. Кюнзегеш, Ч. Кара-Күске, З. Намзырай, С. Майнак, В. Серен-оол, Н. Ооржак, А. Даржай, С. Сүрүн-оол, Н. Куулар болгаш оон-даа өске чогаалчыларның шүлүктеринге ырылар кылдыр аялгаларны бижээн. Ол каяа-даа ажылдап чорааш, бот-тывынгыр артисттерни, ылаңгыя аныяктарны деткип, олар-биле сырый харылзааны тудуп, чаа чогааткан ырылары-биле оларны өөртүп чоруур. Владимир Серен республика чергелиг көрүлделерниң каш дакпыр лауреады, ооң киржилгези-биле кожууннуң уран чүүл киржикчилери көрүлделерге киришкеш, доктаамал хөй-хөй чедиишкиннерни чедип ап чоруур.Ол амгы тыва ырыга чаа аян-хөөннү киирип, ону улам сайзырадып, бүгү-ле чырык хүннерин уран чүүлге, культурага бараалгадып чоруур база бир шылгараңгай көскү, бедик мергежилдиг композиторларның бирээзи. Ооң бедик соруктуг ырыларының аялгалары чаа-чаа дилээшкиннерже угланган, хөй талалыг хөгжүмчү.Владимир Бюрбюевич, төрүттүнген хүнүңер-биле быжыг кадыкшылды күзевишаан, сагыш-сеткилди куюмналдыр оттуруп кээр, уяңгылыг аялгалар ам-даа чогааттынарын күзедивис!Материалды И. Д. Ооржак белеткээн.
