Тыва Республиканын А. С. Пушкин аттыг
Национал ном саңы, адалар хүнүнге таварыштыр бистиң кады ажылдап чоруур
коллегавыс Буян Сергеевич-биле таныштырар дыр бис.
Буян Сергеевич Ендан: “Куш уялыг, кижи
чурттуг” дижир болгай, ада-иезиниң тоолчургу чараш чер-чурту Чаа-Хөл кожуунга
төрүттүнген. Өскен-төрээн чери – Чаа-Хөл кожууннуң Булуң-Терек ортумак
школазынга элээн чылдар ишти төрээн чогаал болгаш тыва дыл башкызы болуп ажылдавышаан,
программист ажылын база кылып чораан. Амгы үеде эртем-номнуң узуп төтпес далайы
болган Тыва Республиканың А. С. Пушкин аттыг Национал ном саңында ажылдап
турар.
Буян Сергеевич ынак эштиг, ожук дажы
ышкаш, үш ажы-төлдүң адазы – чаңгыс оолдуг, ийи кыстыг. Уруглары шупту
школачылар.
Өөнун ишти Ендан Снежана Алдын-ооловна –
саң эртеминиң башкызы. Кызылдың № 17 школазында ажылдап чоруур.
Өг-бүлези хостуг үелеринде аян-чорук
кылырынга, арыг агаарга дыштанып, хемнер, хөлдерге эштип, аржааннаарынга ынак.
Оон аңгыда оглу пластилин, элезин-дойдан янзы-бүрү дүрзү-хевирлер чогаадып
кылырынга дыка ынак, а кыстары танцы-самга, бассейнге эштиринге сонуургалдыг.
Ном-сеткүүл номчууру, ыры-хөгжүм
дыңнаары, шыдыраа болгаш стол теннизи ойнаары – Буян Сергеевичинин сонуургалы.
Амгы кылып турар ажыл-ижи бир талазында
информастыг технологиялар-биле база холбашкан: номчукчуларга медээ-информация,
электроннуг номнарны дүргени-биле тып бээринден аңгыда, чуруктар, биидеңнерни
хоюглаары, хол-биле бижээн чүүлдерни парлап, эдип-чазаары, саазын кырында
материалдарны электроннуг хевирже шилчидери, хоолгалаары, ном санынын
сайтызынче киирери, улуг назылыг хоочуннарга компьютерниң эге билиглерин
өөредири дээш оон-даа өске ажылдарны Буян Сергеевич кылып турар.
Ынчангаш адалар хүнү таварыштыр Буян
Сергеевичиге база ном саңында ажылдап чоруур адаларга ажыл-амыдыралынга
чайынналчак чедиишкиннерни, быжыг кадыкшылды күзедивис.
