ШАРАВИИ Валерий Севилбаевич

1929 чылдың май 29-та Тыва Арат Республиканың Чөөн-Хемчик кожуунда Чадаана хемниң кыдыында Чудук-Кажаа деп черге төрүттүнген.

Хайыраканның чеди чыл, Кызылдың 2 дугаар школаларынга, Абаканның башкы институдунга, ВЛКСМ ТК-ның чанында комсомолдуң Дээди школазының журналистика факультединге, Хабаровскиде партияның Дээди школазынга өөренген.
1951 чылдан эгелеп “Шын” солунга корректорлап, “Сылдысчыгаш” солуннуң чогаал ажылдакчызы, килдис эргелекчизи, харыысалгалыг секретарынга, “Тываның аныяктары” солунга харыысалгалыг секретарь, редактор кылдыр, Тываның радиотелевидение Комитединиң даргазының оралакчызынга, телестудияның директорунга болгаш “Шын” солунга кол редакторлап ажылдаан.
Шүлүкчү, журналист.
Баштайгы шүлүктерин 1947 чылда бижип эгелээш, республика солуннарынга парладып эгелээн. “Авамга” деп шүлүктер ному 1968 чылда чырыкче үнген. “Салым-чолдуң шорааннары” деп роман 2000 чылда парлаттынган.
ССРЭ-ниң Журналистер эвилелиниң кежигүнү.
ССРЭ-ниң “Хүндүлелдиң демдээ” орден-биле “Шылгараңгай күш-ажыл дээш В.И.Ленинниң төрүттүнгенинден бээр 100 чыл оюн таварыштыр”, “Күш-ажылдың хоочуну”, “1941-1945 чылдарда Ада-чурттуң Улуг дайынынның Тиилелгезиниң 50 чылы”, Моол Республиканың болгаш Тыва Республиканың “Шылгараңгай күш-ажыл дээш” база “Бүгү Россияның журналистер эвилелиниң 80 чылы” деп юбилейлиг медальдары-биле шаңнаткан.
Тыва АССР-ниң Дээди Совединиң 6-гы чыыжының депутады. Тыва Республиканың алдарлыг ажылдакчызы.