Тываның А. С. Пушкин аттыг библиотеказының национал болгаш чурт-шинчилел чогаалының килдизи Доруг-оол Алдын-оолович Монгуштуң 90 харлаанынга тураскаадып 2018 чылдың декабрь 12-де «Биче-сеткилдиң, хүндүлээчел чоруктуң кижизи» («Гений скромности, вежливости, простоты») деп аттыг номнар делгелгезин салган. Делгелгеде эртемденниң 30 хире ажылдарын, номнарын салган. Чижээлээрге, Монгуш Д. А. «Тыва дыл : ортумак школаның 5-ки клазының өөредилге ному» (1986), «Методиктиг сүмелер : VI-VII класстарга «Тыва дыл» ному-биле ажылдаар башкыларга дузаламчы» (1992), «Тыва дылдың тайылбырлыг словары / ред. Д. А. Монгуш» (Т. I, А-Й, 2003), «Формы прошедшего времени изъявительного наклонения в тувинском языке» (1963), «Тувинский язык и письменность: избранные труды» (2009) дээш оон-даа өске.

Доруг-оол Алдын-оолович Монгуш 1928 чылдың декабрь 12-де Өвүр кожууннуң Арыг-Бажы деп черге төрүттүнген. Д. А. Монгуш Кызылдың 2 дугаар школазын 1949 чылда тергиин эки дооскаш, Абаканың башкы институдунга (1949-1951чч.) өөренген. Оон Москваның Ломоносов аттыг университетиниң дыл факультедин 1957 чылда шылгараан диплом-биле дооскан.

1962 чылдан бээр Д. А. Монгуш Тываның гуманитарлыг шинчилелдер институдунга ажылдап киргеш, чуртталгазының сөөлгү хүннеринге дээр (2017 ч.) ажылдаан. Ол француз, узбек, түрк, тыва, орус дылдарга чугааланыр турган.

Д. А. Монгуш 80 ажыг эртем ажылдарының автору. Ол дыка хөй эртем номнарының редактору, тыва дылдың шинчилекчизи, тыва дылдың өөредилге номнарының автору, тыва дылдың баштайгы тайылбырлыг словарының тургузукчузу. Ол Тыва Республиканың эртеминиң алдарлыг ажылдакчызы, Тыва Республиканың Ордениниң, Улустарның найыралы Ордениниң эдилекчизи.