Россияда чоннарның чаңгыс аай деминиң чылынга база делегейниң төрээн дылдар хүнүнге тураскаадып, «Тыва Пюрбюнү номчуп турар» деп республика чергелиг онлайн-акцияга Кызылдың 9 дугаар гимназиязы база идепкейлиг киришкеннер.
Акцияны тыва классиктиг чогаалдарны суртаалдаар, нептереңгейжидер, тыва дылды кадагалаар сорулга-биле эрттирген. ТР-ниң Националдар херектериниң талазы-биле агентилелиниң удуртукчузу С.М. Ощепкова хемчегни ажыдып, өөреникчи бүрүзү төрээн дылынга ынак болурун чагып, ону кадагалап, сайзырадырының чугулазын айытпышаан, гимназияның ном саңынга элээн хөй номнарны белек кылдыр берген.Солун хемчегге аңгы-аңгы класстардан өөреникчилер тыва чогаалчыларның, ылаңгыя С.Бюрбюнүң шүлүктерин аянныг номчаан.
А. С. Пушкин аттыг национал ном саңының чурт-шинчилел чогаалы болгаш национал библиография килдизиниң ажылдакчылары Буяна Иргит, Чечек Монгуш Тываның Улустуң чогаалчызы С.Б.Бюрбюге «Сөстүң уран мастери» деп делгелгени салып, чогаалчының ажыл-ижин, номнарын өөреникчилерге солун кылдыр таныштырганнар.Моон-даа соңгаар мындыг демнежилгелиг хемчеглерни эрттирип турар болза, өөредилге-кижизидилгеге салдары улуг дээрзин гимназияның башкылары, келген аалчылар-даа демдеглээн.
