А. С. Пушкин аттыг национал ном саңынга чурт-шинчилел чогаалы болгаш национал библиография килдизиниң ажылдакчылары, март 4-түң хүнүнде, культура, саң-хөө ажылдакчызы, шүлүкчү Монгуш Сергей Байыр-ооловичиниң «Чуртум биле чонум алгап» деп номунуң таныштырылгазын эрттирген.
Ук хемчегже чалатканнар хөй болган: артистер, чогаалчылар, башкылар, чаңгыс чер-чурттуглары, чогаалга сонуургалдыглар.
Хемчегниң эгезинде Тываның В. Ш. Көк-оол аттыг национал театрның билдингир артистери: Анзат Куулар, Галина Мунзук, Галина Доржу, Сай-Дажы Найдан болгаш өскелер-даа чогаалчының бижээн шүлүктерин номчукчуларга аянныг номчуп бергеннер.
Дараазында номнуң редактору, аныяк шүлүкчү Эрик Донгак авторга мындыг үнелелди берген: “Бо номнуң авторунуң сеткилиниң чаражын, мээң көрүжүм-биле ында бүгү-ле чүүл эки талаларже угланган болду, ооң чуртталгага ынаан, төрээн черинге кызыгаар чок бердингенин эскердим. Тыва литературада база бир онзагай, чаа үн немешкен-дир” Журналист, чогаалчы, Тыва Республиканың алдарлыг ажылдакчызы Саяна Өндүр, Тыва Республиканың культуразының алдарлыг ажылдакчызы Валентина Монгуш, чаңгыс чер-чурттуглары, чогаалчы, башкы Римма Ооржак, хоочун башкы Наталья Бадыргы чаа номнуң үнүп келгени-биле байыр чедирбишаан, демир-үжүүн ам-даа холдан салбайн чоруурун авторга күзээннер.Чогаалчының бижээн шүлүктеринге чараш ырыларны Тывада билдингир ыраажы Юлияна Ондар сонуургадып, ырлап бергенин келген аалчылар магадаан.
