Россия Федерациязының журналистер,Тываның чогаалчылар Эвилелдериниң кежигүнү, башкы Нина Түлүшовна Эртине «Сылдыстарның сырызындан» деп чаа үндүрген номун А.С.Пушкин аттыг ном саңынга белекке берген.
Чогаалчы-башкының бо номунда төрээн черинге ханы ынакшыл, ие бойдус темазы, чоок кижилеринге арыг-чаагай хамаарылгазын уран-чечен дылы-биле илереткен одуруглар колдаан.Ооң баштайгы ному «Ыдык өдээм» 2002 чылда чырыкче үнген. Чыып чораан үлегер домактары, тывызыктары очулдурган тоолдары, чечен чугаалары солуннарга, «Башкы»
сеткүүлүнге парлаттынгылаан.
Чаа-Хөл ыдык черим
Чаа - Хөл тайга бедик сыннар меңгилери
Чайгы хүнге чайыр чажып мөңгүннелген.
Чиңгир ногаан эзимнерде аңныг-меңниг,
Чиргилчинниг ховуларда тараа чалгаан.
Чиндигир көк далайында балыы ойнаан,
Чечек, үнүш хорагайлыг Чаа-Хөлүм.
Сеткилимни сорук киирип, чалгын чүглээн,
Сиилбээн олбук сагындырар Чаа-Хөлүм.
Үүр-Сайыр аржаанынга дыштанырга,
Улуг кежик өөрүшкүнү биске сөңнээр.
Угулза дег бойдузунга таалал алыр
Уран тоол дег, каас чараш Чаа-Хөлүм.
