Чогаалчы, эртемден, этнограф, «Хамнаар чоруктуң дириг эртинези» деп аттың эдилекчизи М. Б. Кенин-Лопсанның төрүттүнгенинден бээр 100 чыл оюнга тураскаадып А. С. Пушкин аттыг национал ном саңында бо чылды – М. Б. Кенин-Лопсаңның чылы кылдыр чарлаан.
Национал ном саңының удуртукчузу И. А. Эртине келген аалчыларга байыр чедирип, чурт-шинчилел номчулгаларын ажыткан. Хемчегниң хүндүлүг аалчылары чогаалчының уруглары Анна биле Марина Кенин-Лопсаңнар, Тываның чогаалчылар Эвилелиниң удуртукчузу С. С. Комбу, эртемденнер З. Б. Самдан, В. С. Салчак болганнар.Номчулгага аңгы-аңгы 17 илеткелчилер киришкен. Олар Бай-Тайга, Өвүр, Чѳѳн-Хемчик, Чаа-Хѳл, Бии-Хем, Кызыл кожууннарындан киржип чедип келгеннер. Оларның аразында Кызылдың 5, 17 дугаар школаларынның өөреникчилери А. Чооду, Ш. Ланаа, А. Ондар, М. Монгуш солун илеткелдерни номчаан. Чогаалчы М. Б. Кенин-Лопсанга тураскааткан номчулагалар солун болгаш ажыктыг болуп доозулган. Киржикчи бүрүзүнге сертификаттарны тывыскан.
Ук хемчегниң каастакчылары Тываның Улустуң артизи С. Ириль чогаалчының шүлүүнге бижиттинген «Ыраажы-Хем» деп ырыны аалчыларга бараалгаткан, ырының аялгазын О. Сарыглар бижээн. Дараазында «Он-Кум» аттыг мода болгаш костюм театрының самчылары «Хамнар» деп танцыны күүсеткеннер. Оон ыңай республика чергелиг шүлүк мөөрейинниң тиилекчилери аалчыларга чараш шүлүктерин номчуп бараалгатканнар.
