А. С. Пушкин аттыг Национал ном саңынга, сентябрьның
24-түң хүнүнде, Россияның журналистер болгаш чогаалчылар Эвилелдериниң
кежигүнү, чогаалчы Лидия Херлииевна
Иргиттиң 70 харлаанын таварыштыр чурт-шинчилел болгаш чогаал килдизиниң ажылдакчылары солун ужуражылганы
эрттиргеннер.
Лидия Иргит 1954 чылдың сентябрь
24-түң хүнүнде Бай-Тайга кожууннуң Шуй
сумузунуң Сайыр-Аксы деп черге төрүттүнген. Школачы үелери Мөңгүн-Тайганың Мугур-Аксынга, а чалыы
үелери Кызылдың башкы институдунга эрткен. Институтту дооскан соонда, Москвада М. Горький аттыг литература институдунуң
чанында Литератураның дээди курстарын чедиишкинниг дооскан.
Ол 1979 чылдан эгелээш, Тыва Республиканың Күрүнениң телерадиокомпаниязынга
журналист кылдыр ажылдап эгелээн. 1972 чылда ооң баштайгы «Дамды» деп аттыг
шүлүү парлалгаже үнген.
Ужуражылганы байыр чедириишкини-биле А. С. Пушкин аттыг Национал ном
саңының директору Ирина Эртине ажыткан.
Дараазында байырлыг сөстү Культура яамызының сайыдының оралакчызы А. Х.
Өлчей чогаалчының хөй чылдар дургузунда культурага, уран чүүлге киирген
ачы-хавыяазы дээш, «Культураның болгаш уран чүүлдүң хүндүлүг хоочуну» деп хөрек демдээ-биле шаңнаан база Чазак
Баштыңы В. Т. Ховалыгның мурнундан өөрүп четтириишкин бижиин номчаан. Дээди Хуралдың депутады А. К. Монгуш, Кызыл хоорай чагыргазының культура, спорт
болгаш аныяктар политиказының даргазының түр када хүлээлгезин күүседип турар
Солаңгы Валерьевна чогаалчыга байырлыг сөстү дамчытканнар.
Тыва Республиканың чогаалчылар Эвилелиниң даргазы С. М. Өндүр, Тываның
журналистер Эвилелиниң баштаар чериниң даргазы
К. К. Монгуш, чогаалчылар Н. Ш. Куулар, М. А. Күжүгет, Л. Х. Ооржак, А.
С. Шоюн, Тываның болгаш Кызылдың хоочуннар чөвүлелдериниң даргалары С. К.
Долгар, О. К. Дамдын база байыр сөзүн чедиргеннер.
Тываның билдингир эртемденнери З. Б. Самдан, У. П. Бичелдей, Ш. Ю. Күжүгет, Р. М. Донгак
чогаалчыга байыр чедирип, солун сактыышкыннарны
чугаалааннар.
Оон ыңай Кызылдың 9 дугаар гимназиязының хоочун башкылары В. Ө. Дөмүр-оол, С. Ш-М. Чооду чогаалчының эрттирип турганы “
Саянның чаңгызы” деп бөлгүмүнге улуг үнелелди берип,чылыг, чымчак байыр
чедириишкиннеринге каттышканнар. Кызылдың
№ 2 ортумак школазының 6 «г» клазының өөреникчилери чогаалчының шүлүктерин аянныг номчааннар.
Ол ышкаш “ Мөңге дээр” деп хамнар ниитилелиниң даргазы А.Даш-оолович:
“Лидия Иргит кижилерниң сагыш-сеткилин чазай тудуптар, дузааргак, амыдыралче
дески көрүштүг чогаалчы, угбавыс”- деп чылыг, чымчак байыр сөстерин чедирген.
Келген аалчылар, эш-өөрү ужуражылганы магадап, боттарының сонуургаан айтырыгларын тус-тузунда
салып турганнар. Лидия Херлииевна мөгейикчилеринге өөрүп четтиргенин
илередип, “ Чүрээм быжыг, ырлап шыдаар
күчүм ам-даа бар” деп сеткили ханып чугаалаан.
Байырлыг
ужуражылга соонда, шупту төөгүлүг чуруктарга тырттырган.
