Латкина Надежда Александровна Өвүр кожууннуң Хандагайты суурга, 1949 ч. август 24-те, интернационалчы өг-бүлеге төрүттүнген. Школачы чылдарында ном номчуурунга сонуургалдыг, бир-ле чогаалчының номун номчаан, ооң дугайын эштеринге чугаалап бээринге ынак турган. Школаны дооскаш, Чөөн-Сибирьниң Культураның күрүне институдунче кирип алгаш, өөредилге черин чедиишкинниг дооскан. 1972 ч., тускай мергежилдиг, аныяк кадрны, Каа-Хем кожууннуң Сарыг-Септиң төп ном саңының эргелекчизи кылдыр томуйлаан. Удаваанда ажыл-агыйынга негелделиг, харыысалгалыг боорга, директор кылдыр депшиткен. Надежда Александровна ол ажылды үзүктел чок 40 ажыг чыл билдилиг удуртуп келген, ном саңының хүндүткелдиг хоочуну. Ол ажылдап келген үелеринде кожууннуң, республиканың ном саңнарының бурунгаар хөгжүлдезинге хамаарышкан чугула айтырыгларны чөптүү-биле шиитпирлежип, хөй-ле федералдыг программаларның боттанырынга арга-сүмезин кадып, улуг үлүг-хуузун киириштирип келген.

Республикадан дашкаар ном саңнарының ажыл-агыйын, арга-дуржулгазын өөренип, сонуургап, аныяк ажылдакчыларга бодунуң эгээртинмес байлак дуржулгазын харам чокка дамчыдып берип чораан, эптиг-ээлдек, дузааргак дагдыныкчы, шыырак билиглиг сүмелекчи.

Надежда Александровнаны тыва культураның сайзыралынга киирген эгээртинмес үлүг-хуузун үнелеп, 2000 ч. «Тыва Республиканың культуразының алдарлыг ажылдакчызы» деп бедик атты тывыскан. Ол ышкаш Тыва Республиканың Улуг хуралының хүндүлүг бижии база 1994 ч. республика чергелиг ном саңнарының удуртукчуларының аразынга «Чылдың директору» деп атка төлептиг болуп, Тываның уран чүүл кылыгларының ус-шеверлериниң тускай чагыг ёзугаар хол-биле кылган дүжүлге бөргү (корона), сыргалары-биле шаңнаткан.

Ном саңының хоочун ажылдакчызы, хүндүлүг коллегавыс, Надежда Александровнага төрүттүнген хүнү-биле чылыг, чымчак байырывыс чедирбишаан,быжыг кадыкшылды, узун назынны, сүлде-сүзүү, хей-аъды ам-даа бедик болурун йөрээдивис!

Материалды И. Д. Ооржак белеткээн.