Шылгараңгай көскү күрүне ажылдакчызы, Тыва Республика Ордениниң ийи дакпыр эдилекчизи, СЭКП тыва обкомунуң бирги секретары чораан Григорий Чоодуевич Ширшинниң 90 харлаан юбилейинге тураскааткан байырлал, август 7-де, Кызылдың Улусчу чогаадылга бажыңынга, Республика деңнелинге эрткен.
Ук байырлалда ооң хөй санныг эш-өөрү болгаш үежилери, кады ажылдап чораан коллегалары, чоок болгаш төрээн кижилери, чалаттырган аалчылар хөйү-биле келгеш, чылыг, чымчак байыр сөстерин чедиргеннер.
Тыва Республиканың А. С. Пушкин аттыг Национал ном саңының чурт-шинчилел болгаш чогаал килдизиниң ажылдакчылары Григорий Чоодуевичиниң 90 харлаан байырлалынга, ооң күш-ажылчы болгаш амыдыралчы оруунга тураскаадып, «Тываның төөгүзүнге балалбас исти арттырган» деп номнар делгелгезин салганнар. Ол ышкаш Г. Ч. Ширшинниң аңгы-аңгы чылдарда шаңнадып чорааны Хүндүлел бижиктерин, даштыкы дылдарның солун-сеткүүлдеринде чырыттынган интервьюларын болгаш хөй санныг медальдарын база делгээн.
Тематиктиг делгелгени келген аалчылар аажок сонуургап, Григорий Ширшинниң ажыл-амыдыралы, кылып келген ажыл-ижи-биле база катап, дагын таныжар аргалыг болганнар.
