Хүндүлүг номчукчулар!

Тыва Республиканың чогаалчылар эвилелиниң кежигүнү, башкы, республикада билдингир шүлүкчү, прозачы Лидия Хорагаевна Ооржак  «Чүрек согуу деңге соп чор» (2024)  деп шүлүктер чыындызын чырыкче үндүрген. Ук номда автор дайын-чааның айыыл-халавын, дайынчы хүлээлгезин  эрес-дидим күүседип чоруур тыва оолдарның дугайында база амгы үениң эң-не аарышкылыг, кударанчыг хүннерин, ооң улуг-бичии кижилерге чедирип чоруур когаралының дугайында бижээн.

Көвей, көвей...

Хөй-ле чылдар бурунгаар

Көңгүс чалыы –

Хөйнү көрбээн оолдарын,

Таңды-Тыва

Талыгырда дайынче,

Эрестерин,

Эки-тура аъткарган...

Чижээ: Донецк, Луганск Республикаларны хостаарынга киришкен, дайынчы оолдарның чырык адын мөңгежиткен одуруглар:

Маны дашта хөрек чуруу мөңге дириг

Маадырларның дидим соруу уттундурбас!

Дөспес, орлан карактарның шоваазын аар,

Дөңгүр баштыг оолдарның чоктанчыын аар...

 

Шүлүк чогаалының база бир онзагай талазы – кижилерниң тура-соруун бедидер, сагыш-сеткилин байыдар база күчү-күштү киирер сорунзалыг.  Өскен, төрээн чуртунче тиилелгелиг чанып кээрин, энерел сеткилинден кыйгырган шүлүктер кижиниң сагыш-сеткилин оожургадыр.  

Сооктар эртип, чылыг час, чай дүжүп келзин!

Соңга караан каастаан хээлер эрип кагзын!

Соңгаар черде частыышкыннар соксай берзин!

Чоннуң чараш оолдары чанып келзин!

***

          Дайын-чааны узуткаан

Таңды-Тыва оолдары,

Ада-чурт дээш тулушкаш,

Амыр-менди ээп келир!

Өскен-төрээн чериңер

Өөрүшкүлүг уткуп аар!

 

Ном аныяк салгалды чуртунга ынак, өске бүгү эш-өөрү дээш, сагыш-сеткили аарып чоруур, хамааты быжыг туруштуг болурунга салдары улуг.

   

Ажыглаан литература:

1.              Иргит, Л. Эге сөс : [ Л. Ооржактың бижээн шүлүктеринге эге сөстү чогаалчы Л. Иргит бижээн] / Л. Иргит. – Сөзүглел : дорт // Ооржак, Л. Чүрек согуу деңге соп чор : шүлүктер / Л. Ооржак. – Кызыл, 2024. – Ар. 3-5. 

2.              Ооржак, Л. Чүрек согуу деңге соп чор : шүлүктер / Л. Ооржак. – Кызыл : изд. студия «Далай медээ», 2024. – 43 ар. – Сөзүглел : дорт.