Март 21-ниң хүнүнде, чурт-шинчилел болгаш чогаалдар килдизиниң ажылдакчылары, Кызылдың 9 дугаар гимназияның 8 «а» клазының өөреникчилеринге «Тывызыксыг Тывам» деп темага хамаарыштыр айтырыг-харыыларлыг «Сээң оюннуң» деп хемчегни эрттиргеннер. Класстың удуртукчу башкызы Ооржак Галина Сергеевна.
Уруглар ийи аңгы бөлүк болуп алгаш, бɵлүүнге «Азия», «Эне-Сай» деп аттарны чогаадып адааш, аразында мөөрейлежип ойнааннар. Ук хемчегге электроннуг презентацияның дузазы-биле тыва улустуң аас чогаалынга, тыва оюннарга, чогаалчыларның чогаалдарынга, тыва ырылар дугайында айтырыгларга харыылааннар. Олар айтырыг бүрүзүнге тодаргай харыыларны берип, идепкейлиг киришкеннер.
Башкызы база уруглар оюннарга улуг сонуургал-биле киржип, ажыктыг, өөредиглиг чүүлдерни билип алганынга четтиргенин илереткеннер.
