Тыва чоннуӊ төөгүзүнде база бир балалбас чырык арыннарыныӊ бирээзи – 1883-1885 чылдарда Алдан-Маадырларның тура халыышкынындан бээр 140 чыл оюнга тураскааткан «Өгбелерим бурун чурту – өлчейлиг-ле Оргу-Шөлүм» деп сактыышкын ужуражылга библиотекага болуп эрткен.

Ужуражылгага Алдан-Маадырларныӊ салгалдары киржип чедип келгеннер, оларныӊ аразында улуг өгбевис Тываның Улустуң чогаалчызы Черлиг-оол Куулар, Улустуң артизи Олег Сарыглар, Улустуң хөөмейжизи Андрей Монгуш, чогаалчылар эвилелиниң даргазының оралакчызы Александр Ондар дээш оон-даа өскелер бар.

Андрей Монгуш хемчегни ажыдып, чалаттырган аалчыларга удаа-дараа, чер-чуртун алгап-мактаан ырыларны аян тудуп, бараалгаткан.

Улустуң артизи Станислав Ириль чогаалчы Александр Ондарның «Бижээчи» деп тоожузундан үзүндүнү аянныг номчуп күүсеткен.

Сүт-Хөл кожууннуң чагырга чериниң төлээзи Алдан-Маадырларның салгакчылары, улуг назылыг өгбелеривиске, 140 чыл оюнга тураскааткан юбилейлиг хөрек демдектерин тывыскан.

Тываның гуманитарлыг болгаш социал-экономиктиг тускай шинчилелдер институдунуң эртемденнери Василий Салчак, Уран Донгак болгаш Людмила Мижит Алдан-Маадырларныӊ тура халыышкынынныӊ дугайында солун илеткелдерни кылганнар.

Тыва Республиканың алдарлыг ажылдакчызы, тыва фольклор чыыкчызы Дарыма Ондар Киш-Чалааевичиниң өг-бүлези Алдан-Маадыр сумузунуң ном саңынга белек кылдыр номнарны сөңнээн.

«Төрел бисбес – түрээр, төөгү билбес – төөрээр» деп чиге сөглээн үлегер домаавыс бар, ынчангаш келир үевистиӊ салгалы – аныяк өскенге, эрес-дидим маадырларывыс чонунуӊ хостуг амыдыралы дээш, төрээн чурттунуӊ хаамаарышпас чоруун камгалап, боттарыныӊ амы-тынын харамнанмайн, Цин хаанныг күрүнениӊ каржы-дошкун дарлалынга удур демисежип чораан маадырлыг чоруу уттундурбайн, чырык тураскаал кылдыр арттырып, чер-чуртунга ынак патриотчу хамаарылгазын кижизидер дээш, «Алдан-Маадырларныӊ салгалдары» деп инициативтиг бөлүк-биле ук хемчегниӊ эрттиргенин, чалаттырган аалчылар солун болгаш ажыктыг деп үнелелди берген.