Июнь 20-де А. С. Пушкин аттыг Национал ном саңынга Тываның сураглыг композитору, чонга билдингир апарган, дыка хөй ырыларның автору Хүреш-оол Кара-Салович Дамбаның 80 харлаанынга тураскааткан хемчегни эрттирген.

Хемчегге Тываның «Чечек-Саян» ансамблиниң алдарлыг хоочуннары, эштери, өөреникчилери Х. Дамбаның бижээн ырыларын күүсетпишаан, композиторнуӊ дугайында чылыг-чымчак сактыышкыннарны чугаалааннар.

Композиторнуң допчу намдары-биле Тыва Республиканыӊ алдарлыг артизи Татьяна Соржу таныштырган. Ыраажылар «Аныяк кадарчылар дугайында ыры», «Тыва кызы», «Чогаадыкчы ажылчын чон бис», «Шолбаным сен», «Ынакшыл чокта, чуртталга чок» дээш, оон-даа өске ырыларны күүсеткеннер. База 9 дугаар школаның өөреникчилери Ангел Оюн (2 класс), Денис Ооржак (6 харлыг) «Элдеппей» деп ырыны күүсеткеннер.

Ук хемчег номчукчуларга солун, ажыктыг болуп эрткен.