Кударанчыг чараш ыры,
«Курай, курай» чаңгыланды.
Ооржак Николай Болустаевич – Тыва Республиканың
чогаалчылар эвилелиниң кежигүнү, сураглыг чогаалчы, прозаик, композитор.
Ол
1943 ч. апрель 18-те Тыва Арат Республиканың Барыын-Хемчик кожууннуң, хөлегелиг
көк-көк дагларлыг, Ак деп черге төрүттүнген.
Шекпээр,
Кызыл-Мажалык школаларынга өөренип чораан. Школачы чылдарында ырлаарынга, шүлүк
чугаалаарынга база хаактаарынга, волейбол ойнаарынга хандыкшылдыг чораан.
Николай
Болустаевич бөдүүн, биче сеткилдиг,
оожум-топтуг, кандыг-даа ажылды «чажам» дивес кылыр чораан. Шекпээр совхозунга бызаңчылап, комсомол комитединиң
секретары бооп, харылзаа белдиринге монтёрлап, көдээ клубка удуртукчулап
ажылдаан. Ол ышкаш Хандагайтының клувунга чурукчулап, улусчу театрны хөй
чылдарда удуртуп, уран чүүлге бараан болуп келген.
Чогаал
ажылын 1963 ч. эгелээн. Ооң шүлүктери «Хемчиктиң сылдызы», «Тываның аныяктары», «Шын»
солуннарга, «Улуг-Хем»
альманахка парлаттынгылаан. Баштайгы шүлүктериниң чыынды ному «Ханы ынакшыл»
(1975) деп аттыг чырыкче үнген. Дараазында чылдарда «Сында
орукта» (1980), «Кышкы
челээш» (1987) деп номнары чырыкче үнгүлээн. Ооң шүлүктериниң
темалары: бодунуң ажыл-ишчи намдарынга, төрээн чериниң каас чараш бойдузунга,
кижилер аразында эптиг-демниг ажыл-ишке, найыралга, ханы ынакшылга
тураскааткан.
Чонда
билдингир «Курай-Курай» болгаш оон-даа хөй чараш
ырыларның автору.
«Николай Болустаевич
Ооржактың сагыш-сеткилиниң байлаа, ооң чүве билири бир оранда ажыттынмаан чараш
октаргай-биле дөмей кижи болган. Кандыг-даа темаларга чугаалажып, сайгара
бээривиске, ооң илдигер чери, дужакталы бээр чери чок, кайгамчык. Ол чогаал
бижий бергенде боданмас-даа, катап дүжүрүп биживес-даа, төндүр бижиптер. Ол
ырлап, шүлүктээр, баянга ойнаар, чуруттунар, чурук тыртырар. Ол черле ажынып, хорадап
деп чүве билбес, нервизи дыка-ла быжыг кижи чүве...» – шүлүкчү Мадон Монгуштуң
сактыышкыны.
2004
ч. чырык өртемчейден чарлып чоруткан.
Материалды И. Д.Ооржак
белеткээн.
