Тыва Республиканыӊ А. С. Пушкин аттыг национал ном саӊынга 2022 ч. декабрь 13-те шүлүкчү, драматург, Тываныӊ чогаалчылар эвилелиниӊ кежигүнү, Тыва Республиканыӊ алдарлыг ажылдакчызы Нина Даш-ооловна Сереноттуӊ юбилейинге тураскааткан ужуражылга болуп эрткен.

Н. Д. Серенот 1952 ч. декабрь 13-те Ɵвүр кожууннуӊ Дус-Дагга тɵрүттүнген. Бичии чылдары, ɵскен чери Торгалыгга эрткен. 1973 ч. Кызылдыӊ эмчи училищезин дооскаш, 15 чыл дургузунда кадык камгалал шугумунга ажылдаан. Кызылдыӊ башкы институдунуӊ тыва дыл, литература салбырын дооскан. 1986-1987 чылдардан бээр шүлүк чогаалын бижип эгелээн. 1996 ч. «Чимистер» деп аттыг шүлүктериниӊ баштайгы номчугажы чырыкче үнген. Дараазында «Тɵнчү чок ынакшыл», «Ырым аялгазы», «Чуртталгамныӊ чурумалдары», «Хаяаланган чырык», «Эрткен үени утпас дээш» деп номнарны бижээн.

Ужуражылгага Тываныӊ чогаалчылар эвилелиниӊ даргазы С. Комбу, Тываныӊ Улустуӊ чогаалчызы Н. Куулар, чогаалчылар Р. Ховалыг, Р. Ондар, У. Эртине, Н. Эртине, Тыва Республиканыӊ культуразыныӊ алдарлыг ажылдакчызы З. Д. Монгуш, тыва радионуӊ хоочуннары С. Данзын-оол, Л. Донгак,Т. Байынды база чогаалчыныӊ эш-ɵɵрү келгеннер.

Ужуражылганы Тыва Республиканыӊ болгаш Таӊды кожууннуӊ культуразыныӊ алдарлыг ажылдакчызы, композитор С. И. Бадыраа, Тыва Республиканыӊ В. Ш. Кɵк-оол аттыг хɵгжүм-шии театрыныӊ билдингир артизи Т. Э. Хɵвеӊ-оол Н. Сереноттуӊ шүлүүнге бижээн «Уттундурбас чалыы назын», «Чаражымныӊ чассыдыы» деп ырыларны аалчыларга бараалгаткан.

Ужуражылга аалчыларга уттундурбас, солун болуп эрткен.