Оюн Кодур-оол Тарымаевич – очулдурукчу, билдингир журналист.
Ол 1942 ч.
май 25-те Тыва Арат Республиканың Таңды кожууннуң Могай суурунга төрүттүнген. Бай-Хаак
ортумак школазын, Кызылда күрүнениң башкы институдун база журналистер курузун
дооскан.
«Тываның
аныяктары», «Шын» солуннарга корреспондентилеп, Тываның көдээ ажыл-агыйның
дуржулга станциязынга бичии эртем ажылдакчызы бооп, «Улуг-Хем» солуннуң
фотокорреспондентизи база килдис эргелекчизинге чедир ажылдааш, көжүп чоруур
механизастаттынган колоннага тудугжулаан.
Ол
«Деткимче-Содействие» солуннуң үндезилекчилериниң бирээзи. Сөс биле парлалганың
хосталгазын чедип аар дугайында публицистиказы, очерктери республика
солуннарынга, «Улуг-Хем» альманагынга парлаттынгылаан.
Ада-чурттуң
Улуг дайынынга киришкен тыва эки турачыларның эрткен дайынчы оруунуң дугайында
ССРЭ-ниң камгалал Министерствозунуң архивинден хөй чүүлдү чыггаш,
эки-турачыларның шын даңзызын истеп, сураглааш, 1970 ч. «Эки турачылар бирги одуругда»
деп номну чырыкче үндүрген. Ном Ада-чурттуң Улуг дайынынга киришкен тывалар
дугайында документалдыг чогаал, автор барымдаалыг чүүлдерни тодарадырда архив
документилеринге бүрүн үндезилээн. Ооң эге очулгазы-биле О. К. Саган-оолдуң,
К-Э. Кудажының, Д. Бегзиниң, С. С. Сүрүң-оолдуң, М. Ч. Көжелдейниң, М. Б.
Кенин-Лопсаңның, Б. Д. Хөвеңмейниң, В. Б. Монгуштуң чогаалдары орус дылга
парлаттынган.
Кодур-оол
Тарымаевич ССРЭ-ниң Журналистер
эвилелиниң кежигүнү. СЭКП ТК-ниң, ССРЭ-ниң Министрлер Чөвүлелиниң, ВЦСПС биле
ВЛКСМ ТК-ниң «XI-ги беш чылдың шалыпчызы» хөрек демдээ-биле шаңнаткан. Тываның
Журналистер шаңналының лауреады.
1991 ч.
август 27-де айыылга таварышкаш мөчээн.
«Ада-чурттуң Улуг дайынынга киржип
чораан тываларның ат-сывын тодарадып тывары нарын болгаш берге, фронтучуларның
дайынчы намдарында билдинмес айтырыглар ам-даа арбын болган ужурунда, оларның
дугайында документалдыг тоожумну төнген деп санап шыдавас-тыр мен». (Оюн Кодур-оол).
