Апрель
1-де Тываның А. С. Пушкин аттыг Национал ном саңының национал болгаш
чурт-шинчилел килдизинге башкы, шүлүкчү, очулдурукчу Куулар Мижит-Доржуевич Сүттүг-оолдуң 95 харлаан юбилейинге
тураскааткан сактыышкын ужуражылга болуп эрткен.
С.
М.-Д. Куулар 1927 ч. март 18-те Чөөн-Хемчиктиң Шеми суурга тɵрүттүнген. Ол 1945 ч. башкының түр курузун дооскаш Чыргакы, Хорум-Даг, Баян-Тала, Бажың-Алаак
школаларынга башкылап ажылдап чораан. 1952 ч. башкы училищезин, 1968 ч. башкы
институдун бот өөредилге-биле дооскан.
С. М.-Д. Кууларның баштайгы шүлүү «Шын» солунга
парлаттынган. 1977 ч. «Кышкы шивилер» деп шүлүктерлиг
баштайгы ному, 1991 ч. «Чүректерниң тураскаалы» деп чыынды
ному чырыкче үнген.
Ужуражылгага Тываның чогаалчылары, Кызылдың А. Б.
Чыргал-оол аттыг уран-чүүл колледжиниң библиотека салбырының I-ги курузунуң сургуулдары,
чогаалчының уруглары болгаш чоок кижилери киришкен.
Хемчегни Тываның чогаалчылар Эвилелиниң даргазы С. С. Комбу ажыдып, чогаалчы С. М.-Д. Кууларныӊ
чогаадыкчы ажыл-ижин аалчыларга таныштырып чугаалаан. Дараазында чогаалчылар
Эвилелиниң оралакчы даргазы А. С. Ондар,
чогаалчының ɵɵреникчизи Р. О. Ондар,
тɵрели Н. Бяков, уруглары И. С. Монгуш, Н. С. Куулар, Ч. С. Монгуш
дээш оон-даа ɵскелер Сүттүг-оол Мижит-Доржуевичиниӊ дугайында чылыг-чымчак
сактыышкыннарны чугаалааннар.
Ужуражылгага «Чырык
күзел» аттыг хоочуннарның ыры-хɵгжүм ансамбли чогаалчының сɵзүнге
бижиттинген «Шеми хеми ырлап чор мен», «Авамга йɵрээл» дээш оон-даа ɵске ырларны
күүсеткеннер. Тыва Республиканыӊ культуразының алдарлыг ажылдакчызы, ыраажы В. А. Чооду «Ынакшыл чокта – чуртталга чок»
деп чогаалчының сɵзүнге бижиттинген чараш ырыны күүсеткен. Ырының аялгазын
билдингир композитор Д. Хуреш-оол
бижээн.
Кызылдың А. Б. Чыргал-оол аттыг уран-чүүл колледжиниң
сургуулдары чогаалчының шүлүктерин аалчыларга солун кылдыр номчуп күүсеткеннер.
Чогаалчының чечен-мерген шүлүктери ам-даа номчукчуларны
өөртүп, мөңгеде бистиң-биле кады чоруур.
