Баштайгы дээди эртемниг тыва интеллигенцияның бирээзи, бедик мергежилдиг очулдурукчу Алексей Делгер-оол 1927 ч. март 28-те Бай-Тайга кожууннуң «Улуг-Ооруг» деп өдекке малчын өг-бүлеге төрүттүнген.
Кызылдын № 2 дугаар школазын мөңгүн медаль-биле дооскан баштайгы доозукчузу. 1957 ч. Ленинградтың күрүне универсидединиң филология салбырының доозукчуларының бирээзи.
Ажылчын базымын «Тываның аныяктары» солунга корреспондентилеп база Бай-Тал, Шуй, Аксы-Барлык школаларынга башкылап ажылдаан.
Ол орус дылдан тыва дылче делегейге билдингир Э. Хемигуэйниң «Старик и море», А. Пушкинниң «Пиковая дама» дээн чижектиг чогаалдарын болгаш өске-даа ажылдарны очулдурган. «Тыва-орус», «Орус-тыва» словарьлар номнарын тургузарынга бодунуң улуг үлүүн киириштирген.
Ажыл-амыдыралының сөөлгү чылдарында ТНИИЯЛИ-ТИГИ-ниң дыл секторунга ажылдап чораан.
Алексей Канчыырович Тывавыстың база бир салым-чаяанныг, мерген угаанныг, ховар оглу.