Национал
болгаш чурт-шинчилел чогаалының килдизинде февраль 28-те башкы, методист,
эртемден Хомушку Сайынотович Алдын-оолдуң 100 харлаан юбилейинге
тураскааткан «Чырыдыкчы башкы»
(«Педагог просветитель») деп аттыг номнар делгелгези салдынган. Ында 1972,
1975, 1980 чылдарда үнген «Үжүглел» номнары, 1966, 1970, 1980 чылдың методиктиг
сүмелери делгеттинген. Оон ыңай Х. С. Алдын-оолдуң дугайында бижээн ажылдарны
салган.
Х.
С. Алдын-оол 1922 ч. Барыын-Хемчик кожууннуң Аяңгаты суурга тɵрүттүнген.
1935 ч. Барыын-Хемчиктиң эге школазынче ɵɵренип кирген. Оон ɵɵредилгезин
Кызылдың № 1 дугаар школазынга уламчылаан.
Кызылдың
№ 1 дугаар школазын дооскаш, 1941 ч. Чадаананың 7 чыл школазынга тыва дыл
болгаш чогаал башкызы болуп ажылдаан. 1945-1949 чылдарда Кызылдың башкы училищезин
чедиишкинниг дооскаш, Абакан хоорайның башкы институдунче ɵɵренип кирген. 1951
ч. башкы институдун дооскаш, тыва дыл болгаш литература башкызы деп дипломну
алган. 1953-1958 чылдарда Чадаананың № 1 дугаар школазынга директорлап ажылдаан.
1965
ч. РСФСР-ниң национал школаларының эртем-шинчилел институдунуң аспирантуразын
дооскаш, педагогика эртемнериниң кандидады деп эртем адын чедип алган. Ол Тываның
баштайгы эртемденнериниң бирээзи. Ол-ла чылын Кызылдың педагогика институдунуң
ректору болуп ажылдаан. Х. С. Алдын-оолдуң ɵɵредип, кижизидип каан
сургуулдарының иштинден хɵй кижилер республикада билдингир башкылар, күрүне
ажылдакчылары болган.
Х.
С. Алдын-оол хɵй-хɵй эртем ажылдарын бижээн. Республиканың школаларының эге
класстарынга «Үжүглел» деп ɵɵредилге номнарының база тыва дылдың методиктиг
сүмелериниң автору.
Россияның
школаларының алдарлыг башкызы, РСФСР-ниң улус ɵɵредилгезиниң тергиини Х. С.
Алдын-оол республикада бедик ат-алдарлыг, хүндүткелдиг кижилерниң бирээзи
чораан. Күш-ажылдың Кызыл Тук ордени болгаш «1941-1945 чылдарда Ада-чурттуң
Улуг дайынынга шылгараңгай күш-ажылы дээш» база «Күш-ажылдың хоочуну» деп
медальдарның эдилекчизи. Х. С. Алдын-оол бедик шаңналдарга тɵлептиг чырыдыкчы
башкы.
