Англи дылдыг чоннарга тыва дугайында делгем,  долу болгаш  тодаргай  улуг тайылбыр берип, таныштырылга кылган, көскү  чогаалдарның бирээзи Александр Дуглас Митчелл Каррутерстиң «Неведомая Монголия» деп ному болур. Номнуң чамдык эгелерин автор  1912 чылдың июнь айда Лондонга Британияның географтыг ниитилелиниң бир сеткуулунге    англи дылга парладып,  номчукчуларның  сонуургалын хайныктырган соонда 1913 чылдың апрель айда арткан эгелеринден  үзүндүлерин парлаткаш, ол-ла чылын, 2 томнуг тускай ном кылдыр, Лондонга парлаткан.  Авторнуң дугайында интернет четкилеринде орус дылда бижиттингенин езугаар алырга, ол 1881 чылдың октябрь 4-те,  Лондонга төрүттүнгеш, 1962 чылдың май айда чок болган.  Делегейде эң бедик мергежилдиг башкыларның ачызында  сургуулдарны  ханы билиглер - биле чепсеглеп чораан   өөредилге  черлери турган. Кембриджке колледж дооскан соонда, Дуглас Каррутерс англи чазактың географтыг ниитилелиниң аңгы-аңгы   кежигүннериниң ажылынга  дузалажып, секретарь бооп ажылдап тургаш,   бижиир мергежилди шиңгээдип алыр аргалыг болган.  1905-1906 чылдарда,  25 хар чеде берген үезинде,   Британияның кол музейиниң  Конгоже экспедициязынга киржир тиилелгени чедип ап,  аян - чорук кылыр   баштайгы  дуржулганы  шиңгээдип алган. 1910 -1911  чылдарда  ол Тываны шинчилээр  аян - чорук кылыр  тускай экспедицияга киржип,  Сибирь таварып, Төп Азияда тывалар чуртунче   чедер  аргалыг болган. Экспедиция соонда, Дуглас Каррутерстиң бижээни «Неведомая Монголия»  1913 чылда Англи чазактың географтыг ниитилелиниң алдын медаль шаңналын  алыр аргалыг  болур.      Ном, сеткүүл талазы-биле бай - байлак, маңаа хамаарыштыр алыр болза  «көрбээни чок» деп болур сайзыраңгай англи ниитилелдиң кежигүннеринге Тыва дугайында кандыг-даа  медээ тайылбырлыг номнар чогундан ону  орта билбес чораан номчукчуларга  «Неведомая Монголия» чаңнык  «кызаш» дээни биле дөмей  болганы чугаа чок.

Номнуң эге чүүлүнде  авторнуң бижээни:  «Настоящая экспедиция обязана исключительно частной инициативе; она была задумана и осуществлена усилиями частных лиц…Мой отчет об этой экспедиции дополняют   написанные Миллером главы об охоте за крупной дичью и  о забавах (спорт), которым предается население в районах, нами посещенных». 1913 чылда ном Лондонга парлаттынып үнүп келгенде, лорд Керзон Келстонскийниң бижээнин тыва дылче очулга чок дамчыдарга мындыг: «Эти районы интересны главным образом  тем, что в их пределах сталкиваются между собою различные соперничающие племена, верования и политические силы. Мы встречаем здесь и предприимчивого, испытанного русского переселенца, влекомого сюда обилием минеральных богатств, переселенца, проявляющего  спокойную уверенность, что будущее  здесь принадлежит  только ему одному. Видим здесь  и монголов, наследников могущественного прошлого, долгое время находившихся под истощающим и растлевающим влиянием вырождающегося ламаизма, но теперь жадно обращающих свои взоры к восходящему солнцу России, в надежде  здесь обрести теплоту и защиту, чего не сумел им обеспечить Китай»… Керзоннуң  дараазында бижип кааны: «Затаенный вопрос, неуклонно сопровождающий  размышления  Каррутерса: кому принадлежит будущее в этих загадочных районах, игравших когда-то выдающуюся роль в мировой истории, и которые, несомненно обнаруживают все признаки своего возможного возрождения?».

1914 чылда  орус дылче Н.В. Турчаниновтуң  очулгазы-биле Петроградка  340 арынныг кылдыр парлаттынган бо ном Тываның ном ундурер черинге, 1998 чылда, номчукчуларның дилээ-биле, катап парлаттынган. Ном  10 кезектиг: 1. Моол кызыгаарынче Сибирь таварып, 2.Бурунгу Сибирь, 3.Сибирьниң кижи дегбээн арга-арыы, 4. Енисейниң үстүү унунда  бассейн, 5.Урянхайларның турлаглары, 6.Үстүү Енисей бассейиниң  төп кезээ, 7.Хемчик хемниң төп кезээ, 8.Урянхайлар болгаш оларның ивилери, 9.Тергениң бедигээштери болгаш Моолдуң салдары, 10. Моол бурунгу болгаш амгы үеде.  

Дуглас Каррутерстиң, 1913 чылда англи дылга  бижиттинген, бо номунда    ол кезектерниң аразында «Келир үең кандыг болур ирги чараш Тыва, байлак Тыва, кээргенчиг Тыва?» деп бодалдарын англи дылда үнген номунда бүдүү илереткен-даа болза, орус дылда очулгазында мындыг одуруглар-биле төндүрүп каан: «Я вполне отчетливо представляю себе этот народ живущим в новых  для него условиях, возрождающимся к новой жизни, как бы вновь воскресающимся, для того, чтобы стать по-прежнему достойным уважения и зажиточным кочевым народом, играющим роль государства буфера между двумя империями – Россией и Китаем».

                                                                                            З.М. Монгуш.