Моолдуң «Аймак Арзылаңы» деп хүндүлүг атты чедип алган баштайгы тыва мөге – Хураган Иван Ивановичиниң юбилейи-биле!
Хураган И. И. Тес-Хемниң Самагалдай суурга, 1956 ч. хөй ажы-төлдүг өг-бүлеге төрүттүнген.
Ооң мөге болган баштайгы базымы 1964 ч. Берт-Даг суурга пионерлер хүнүнге тураскааткан өөреникчилер аразынга болган хүрешке шүүлгени.
1972 ч. школага өөренип тургаш, Моолдан келген мөгелер-биле хүрешкеш, ийи моол мөгени улаштыр октааш, шүүлген. Оон эгелээш-ле Тываның база бир билдингир мөгелериниң санынга кирип, тиилелгелери улаҗып, шаңналдыг черлерни чаалап ап келген. Хураган Иван Тыва АССР-ниң бирги чери дээш 1979, 1983 чылдарда болгулаан хүрештерге шүглүп чораан.
1984 ч. юбилейлиг 128 мөгелер салган республика спартакиадазынга база «Шын» солуннуң шаңналы дээш болуп турган республика чергелиг хүрештерге (1978, 1982, 1987) улаштыр-улаштыр шүүлген.
Самбо, дзюдо болгаш хостуг хүрештерге ССРЭ-ниң спорт мастери, спорттуң национал хевирлеринге Россияның спорт мастери. Ол Тывага дзюдо хүрештиң үндезилекчизи, самбо хүрешке хоочуннар аразынга ийи дакпыр делегей чемпиону.
Ат-сураа чонга билдингир мөгевис хөй-хөй аныяк өскенге үлегер болбушаан, арга-дурҗулгазын дамчыдып берип, бодунуң улуг үлүүн киирип чоруур мөгелерниң бирээзи.
Ооң адын «Тываның XX чүс чылда алдарлыг киҗилери» деп күрүне номунче киир биҗээн, Тыва Республиканың күш-культуразының алдарлыг аҗылдакчызы, Кызыл хоорайның хүндүлүг хамаатызы.
