Тываның А. С. Пушкин аттыг Национал ном саңының национал болгаш чурт-шинчилел чогаалдарының килдизинге,  2021 чылдың  май 20-де, Тыва Республиканың алдарлыг ажылдакчызы, Тываның чогаалчылар эвилелиниң кежигүнү, Сүт-Хөл кожууннуң Хүндүлүг хамаатызы, Россия Федерациязының ФСБ-ниң болгаш Камгалал яамызының шаңналдарының эдилекчизи Александр Сүүр-оолович Ондарның чаа үнген “Ынакшылдың ыдыы” деп барымдаалыг тоожу болгаш чечен чугааларлыг номунуң таныштырылгазы болуп эрткен.

         Ужуражылгага Тываның Улустуң чогаалчылары: Черлиг-оол Куулар, Николай Куулар, Шаңгыр-оол Суван, Тываның чогаалчылар эвилелиниң даргазы, филология эртемнериниӊ кандидады Сайлыкмаа Комбу, шүлүкчү, прозачы,  Россия Федерациязының алдарлыг журнализи, ССРЭ-ниң журналистер эвилелиниң кежигүнү, Россияның театр ажылдакчыларының эвилелиниң кежигүнү, Тыва Республиканың болгаш Россияның чогаалчылар эвилелиниң кежигүнү Александр Шоюн, Тываның чогаалчылар эвилелиниң кежигүнү,  шүлүкчү, чогаалчы Нина Серенот, чогаалчы Галина Кокова, РФ-ның кадык камгалалының тергиини Раиса Ховалыг болгаш Александр Ондарның ФСБ-ге кады ажылдап чораан эш-өөрү киришкеннер.

         Александр Сүүр-оолович ужуражылганың төнчүзүнде ном саңынга чаа үндүрген номун белекке берген.