Тываның А. С. Пушкин аттыг Национал ном саңының национал болгаш чурт-шинчилел чогаалының килдизинге 2021 чылдың март 1-де Россияның алдарлыг база Тыва АССР-ниң Улустуң артизи В. Ш. Кɵк-оолдуң тɵрүттүнгенинден бээр 115 харлаанынга «Кɵрүкчүлер хɵңнүн чазаан» деп сактыышкын-ужуражылга болуп эрткен.

Тываның В. Ш. Кɵк-оол аттыг хɵгжүм-шии театрының артизи Чойганмаа Кара-Сал база Тываның Улустуң артистери Анзат Куулар, Надежда Наксыл Кызылдың 2 дугаар школазының 9-ку клазының ɵɵреникчилери-биле сактыышкын-ужуражылганы эрттирген.

Хемчегниң эгезинде килдистиң ажылдакчызы В. Ш. Кɵк-оолдуң допчу-намдарын ɵɵреникчилерге таныштырган. Дараазында сɵстү чалаттырган аалчыларга дамчыткан. Олар В. Ш. Кɵк-оолдуң «Караның ырызы», улустуң ырызы «Сайыр-Аксы» база «Хайыраан бот» деп шииде Караның монологун күүсеткеннер. Дараазында Надежда Наксыл Виктор Шогжапович-биле ужурашканын сактып чугаалаан.

Уруглар ужуражылганы улуг сонуургал-биле кɵргеш, тɵнчүзүнде чалаттырган аалчыларга четтиргенин илереткеннер.