Тываның А. С. Пушкин аттыг Национал ном саңының национал болгаш чурт-шинчилел чогаалының килдизинде билдингир төре албан-херек ажылдакчызы, саң-хөөчү (финансист) РСФСР-ниң болгаш Тыва АССР-ниң алдарлыг экономизи Бүдегечи Конзулакович Бүдегечиевтиң 100 харлаан оюнга «Саң-хөө адырының баштайгыларының бирээзи» деп номнар делгелгезин кылган. Делгелгеде ооң ук намдарының болгаш ажылдап чораан үелериниң дугайында материалдар кирген.
Бүдегечи Конзулакович Бүдегечиев 1921 чылдың январь 15-те ТАР-ның Улуг-Хем кожууннуң Ийи-Тал сумузунуң Барык деп черге арат улустуң өг-бүлезинге төрүттүнген.
1933 чылда 7 класс дооскаш, Тываның саң-хөө яамызының бухгалтырлар школазынче өөренип кирип алган. Ону дооскаш, эртеминиң аайы-биле Тывтөпкооп адырынга, "Элегест" госхозка, Тываның арга-дуржулгалыг көдээ ажыл-агый станциязынга база Чөөн-Хемчик кожууннуң комсомол комитединге ажылдап чораан.
Бүдегечи Конзулакович 1953 чылда партшколаны өөренип дооскаш, дараазында Москваның экономиктиг институдунга өөренген соонда (1956-1959 чылдар) Тываның ол үеде эң улуг албан черлериниң бирээзи Кызылдың горпонуң баштаар чериниң даргазының оралакчызындан эгелээш, Тыва АССР-ниң саң-хөө сайыдынга чедир депшип ажылдааш, республиканың социал-экономиктиг сайзыралынче, садыг-саарылганың харылзааларының быжыгарынче, материал-техниктиг баазазын сайзырадырынга үлүг-хуузун киирип чораан.