Тыва Республиканың А. С. Пушкин аттыг национал ном саңының эртем килдизинге чаңчыл болу берген “Аныяк экологтуң кичээли” болуп эрткен. Хемчегниң кол сорулгазы – бойдус курлавырларын камгалаары. Бо удаада кичээл республиканың камгалалдыг черлериниң дугайында болуп эрткен. Килдистиң аалчызы – Долаана Мартовна Монгуш, Убсу-Нур ыйгылаажының экологтуг чырыдыышкын килдизиниң методизи. Тывада каш камгалалдыг черлер барын, кандыг-кандыг ажылдар чорудуп турарын тайылбырлап берген. Оон аңгыда тыва улусчу ужурларга хамаарыштыр кандыг ёзу-чурумну сагыырын сүмелээн. Долгандыр турар амылыг бойдуска хумагалыг болуру – кижи бүрүзүнүң хүлээлгези деп билип алыры амгы үеде чугула угланыышкын болуп турар.