Тамба-Сүрүң Александр Чаш-оолович (1914-1971 чч.)
Александр Чаш-оолович Тамба-Сүрүң 1914 чылдың июнь 1-де Чөөн-Хемчик кожууннуң Шемиде Узун-Кара-Сугга төрүттүнген. Чадаананың Алдыы-Хүрээзинге шавылап чораан. 1930 чылда чаа тыва бижик чогааттынарга, ону өөренип, партия чырыдыышкынының түр курстарын дооскан. Шеми, Чыргакы, Теве-Хая, Кызыл-Даг, Ак-Туруг сумуларының 800 ажыг араттарын бижикке өөреткен. Ооң соонда республика типографиязынга өрүкчүлеп ажылдап чораан. 1938-1943 чылдарда «Тываның аныяктары» солунга, Чөөн-Хемчик аревэ кожкомунуң бирги секретары бооп, ол кожууннуң «Ленинчи орук» солунунуң харыысалгалыг секретары бооп база редакторлап, 1949-1958 чылдарда «Большевик» колхозтуң нам организациязының секретары бооп, көдээ клуб эргелекчилеп ажылдап чораан.
Чогаал ажылын 1935 чылда эгелээн. Ооң баштайгы «Бойдус соой берди», «Тыва чуртум» деп шүлүктери «Шын» солунга 1936 чылда көстүп келген. Авторнуң бөлүк шүлүктери «Чыынды чогаалдар» (1937, 1939) «Төрээн чуртувус дээш» деп номнарга парлаттынгылаан. Ол «Хат» (1965), «Шеми хемим» (1977) деп номнарның автору.