Оюн Кодур-оол Тарымаевич
1942 чылдың май 25-те Тыва Арат Республиканың Таңды кожууннуң Могай суурунга төрүттүнген.
Бай-Хаак ортумак школазын, Кызылда күрүнениң башкы институдун база журналистер курузун дооскан.
«Тываның аныяктары», «Шын» солуннарга корреспондент кылдыр, Тываның көдээ ажыл-агыйның дуржулга станциязынга бичии эртем ажылдакчызы бооп, «Улуг-Хем» солуннуң фотокорреспондентизи база килдис эргелекчизи болуп ажылдааш, көжүп чоруур механизастаттынган колоннага тудугжулаан.
Ол – «Деткимче-Содействие» солуннуң үндезилекчилериниң бирээзи, очулдурукчу, журналист. Сөс биле парлалганың хосталгазын чедип аар дугайында публицистиказы, очерктери республика солуннарынга, «Улуг-Хем» альманагынга парлаттынгылаан. Ада-чурттуң Улуг дайынынга киришкен тыва эки турачыларның эрткен дайынчы оруунуң дугайында ССРЭ-ниң камгалал Министерствозунуң архивинден хөй чүүлдү чыггаш, эки-турачыларның шын даңзызын тургускаш, 1970 чылда «Эки турачылар бирги одуругда» деп номну чырыкче үндүрген. Ооң эге очулгазы-биле О. Саган-оолдуң, К-Э. Кудажының, Д. Бегзиниң, С. Сүрүң-оолдуң, М. Көжелдейниң, М. Кенин-Лопсаңның, Б. Хөвеңмейниң, В. Монгуштуң чогаалдары орус дылга парлаттынган.
ССРЭ-ниң Журналистер эвилелиниң кежигүнү.
СЭКП ТК-иң, ССРЭ-ниң Министрлер Чөвүлелиниң, ВЦСПС биле ВЛКСМ ТК-тиң «XI-ги беш чылдың шалыпчызы» хөрек демдээ-биле шаңнаткан. Тываның Журналистер шаңналының лауреады.
1991 чылдың август 27-де айыылга таварышкаш мөчээн.