Сарыкай Дандар-оол Дыртыкович
1932 чылдың май 19-та Тыва Арат Республиканың Улуг-Хем кожууннуң Арысканда Хам-Дыт деп черге төрүттүнген.
Улуг-Алаактың эге, Шагаан-Арыгның чеди чыл, Кызылдың 2 дугаар школаларынга өөренгеш, Москваның Даг институдун дооскан.
Ажылчын базымын Донбасстың, Караганданың, Экибазтузтуң хөмүр-даш шахталарындан эгелээн. “Кызыл-Хавак” шахтазынга даг мастери бооп, Дус-Дагга эргелекчилеп, 1961-1970 чылдарда СЭКП Тыва обкомунуң бүдүрүлге болгаш транспорт килдизиниң инструкторунга, эргелекчиниң оралакчызынга, 1970-1992 чылдарда Каа-Хемниң хөмүр-даш уургайынга ээлчег эргелекчизинден директорнуң оралакчызынга чедир ажылдаан.
Прозаик.
Чогаал ажылын 1962 чылда эгелээн. Чечен чугааларын “Улуг-Хем” альманахка үндүргүлээн. Баштайгы ному “Бустунмаан үүже” 1975 чылда чырыкче үнген. Ооң бодунуң очулгазы-биле ол ном орус дыл кырында 1978 чылда, а “Орук” деп чогаалдарының чыындызы 1994 чылда парлаттынган. Өске авторлар-биле кады “Кывар даш” деп барымдаалыг очерктер номун үндүрген. Ооң чогаалдары “Сибирские огни”, “Байкал” сеткүүлдерге, “Литературная газета” солунунга орус дылда парлаттынган.
1982 чылдан бээр ССРЭ-ниң Чогаалчылар эвилелиниң кежигүнү. “Шылгараңгай күш-ажыл дээш Владимир Ильич Ленинниң төрүттүнгенинден бээр 100 чыл оюн таварыштыр” деп медаль-биле шаңнаткан. ССРЭ-ниң чогаадыкчылар болгаш рационализаторлар ниитилелиниң Дипломунуң эдилекчизи.