Октябрь 31-де А.С. Пушкин аттыг Национал библиотекага «XXI-ги векте ада-ɵгбелеривистиң ёзу-чаңчылдары» деп тɵлевилелдиң база бир хемчээли «Ыдыктыг дүрүмнер. Сагылга. Үнелиг чаңчылдар» деп республика чергелиг мɵɵрейи болуп эрткен. Мɵɵрей ийи аңгы хевирге чарлаттынган (презентация, видеоролик) болгаш назы-харының аайы-биле үш аңгы бɵлүкке чардынган:

1-ги бɵлүк (7-11 хар);

2-ги бɵлүк (12-16 хар);

3-кү бɵлүк (17-24 хар).

Мɵɵрейге 33 кижи республиканың аңгы-аңгы кожууннарыдан  болгаш Кызыл, Ак-Довурак хоорайлардан киришкеннер. Оларның аразындан 15 киржикчини шииткекчилер үндүрген. Видеоролик хевиринге – Иргит Ай-Хоо Бай-Тайга кожууннуң Бай-Тал ортумак школазының ɵɵреникчизи (бичии бɵлүк), Найдан Чечен Тере-Хɵл кожуунуң Кунгуртуг ортумак школазының ɵɵреникчизи (ортумак бɵлүк), Монгуш Субедей Чеди-Хɵл кожууннуң Хову-Аксы ортумак школазының ɵɵреникчизи (улуг бɵлүк) база презентация хевиринге – Монгуш Анзат Өвүр кожууннуң Хандагайты ортумак школазының ɵɵреникчизи (бичии бɵлүк), Делгер Яна Бай-Тайга кожууннуң Бай-Тал ортумак школазының ɵɵреникчизи (ортумак бɵлүк), Соян Ая кɵдээ ажыл-агый техникумунуң сургуулу (улуг бɵлүк)  тɵлептиг болганнар.

Шииткекчилерниң аразында: Валентина Монгуш – ɵɵредилге эртеминиң тергиини, «Ак баштыгларның» кежигүнү, Светлана Донгак –  тɵɵгү эртеминиң кандидады болгаш Айланмаа Аракчаа, Елена Ак-кыс – Пушкин аттыг Национал библиотеканың ажылдакчалары. Мɵɵрейниң тɵлептиг болганнарынга суй-белектер болгаш дипломнарны тывысканнар.

Валентина Монгуш мɵɵрейниң киржикчилеринге арга-сүмезин кадып, моон-даа соңгаар мындыг мɵɵрейлерге идекпейлиг киржирин кыйгырган.