«Театр» деп чүл?
Ол дээрге ёзулуг-ла уран чүүлдүң ордузу-дур!»
Виссарион Белинский
2019 чыл – Россияда
театр чылы. Ону барымдаалааш апрель 3-түң хүнүнде А. С. Пушкин аттыг
Национал ном саңының ажылдакчылары Тываның Виктор Көк-оол аттыг хөгжүм-шии
театрының артизи Анзат Куулар-биле солун ужуражылганы кем-херек
үүлгедикчилериниң истелге үезинде хоругдаттырган черинге эрттирген (ФКУ СИЗО,
Кызыл хоорай).
Бо ужуражылганы кол белеткеп эрттирип турар Национал
библиотеканың социал-экономиктиг литература килдизиниң эргелекчизи Оюн Радмила
аалчызын дөрже чалааш таныштырган. Килдистиң удуртукчу библиотекары Сарыглар
Шончалай олурган дыңнакчыларга Тываның Виктор Көк-оол аттыг хөгжүм-шии
театрының болгаш келген аалчы Анзат Кууларның дугайында презентацияны көргүзуп
сонуургаткан.
Анзат Куулар онзагай салым-чаянныг артист. Ол театрда 40
ажыг чылдар иштинде шии артизи болуп ажылдап чоруур. Романтикалыг-даа,
дүшкүүрлүг-даа (драматиктиг), каттырынчыг, кырган-ава-даа маадырларның ролюн
ойнап күүседир.
Артистиң бүгүдеге билдингир рольдары: Коринкина (А. Н. Островскийниң «Без
вины виноватые»); Прюнетта (Э. Лабиштиң «Мизантроп»); Смеральдина (К. Гальдониниң «Слуга двух господ»).
Россияның алдарлыг, Тываның улустуң артизи Анзат Куулар
И. И. Лопсан, А. К. Ооржак, С. Л. Оюн, С. П. Петренко, К. О. Сагды
режиссерлар-биле хөй чылдарда ажылдап келген. Оон аңгыда ырлаар салым-чаянныг
артист.
Келген аалчы дыңнакчыларга ыры-шоорун, солун чугаазын
күүседип бараалгаткан. Алыс черле улус чалгааратпас баштак-хөглүг артист. «Авам
караа» болгаш «Чедип келем» деп ырыларын дыңнакчыларга аян тудуп ырлааш,
Василий Монгуштуң «Оолдары» деп шүлүүн аянныг номчаан. Назы четпээн оолдар улуг
сонуургал-биле дыннаан.
Хемчегниң төнчүзүнде килдистиң ажылдакчылары театр болгаш
ооң ажылдакчыларының дугайында ном допчулалын кылган.
Россиянын эдип чазаар албан черинин Тывада эргелели биле
Тыва Республиканың А. С. Пушкин аттыг ном саңының кады ажылдажылгазы моон-даа
соңгаар уламчылаар.
